હરિથી હરને જોડતી એસટી બસ દ્વારકા-સોમનાથ કરાઇ બંધ: ગ્રામજનોમાં આક્રોશ

જામનગર એસ.ટી.ડેપો દ્વારા હરિથી હરને જોડતી એસ.ટી. બસ દ્વારકા-સોમનાથ કલ્યાણપુર, લાલપુર, રાવલ સહિતના ગામડાઓના મુસાફરો માટે ખૂબ જ મહત્વની હતી, જે બંધ કરવામાં આવતા ગ્રામજનોમાં આક્રોશ જોવા મળી રહ્યો છે.

બારાડી પંથકને લગત દ્વારકા-સોમનાથ બસ સારી આવક મેળવતી હતી, આમ છતાં જામનગર એસ.ટી. ડીવીઝન દ્વારા એકાએક આ બસને બંધ કરતા ગ્રામજનોમાં તેમજ સમગ્ર બારાડી પંથકમાં આક્રોશની લાગણી જોવા મળી રહી છે.

દ્વારકા-સોમનાથ વાયા કલ્યાણપુર, ભાટીયા, રાવલ, પોરબંદર થઇને સોમનાથ તરફથી આ ટની બસ બન્ને ધાર્મિક સ્થળોને જોડતી હતી અને આ પંથકના લોકોને દર્શનાર્થે સોમનાથ જવા માટે ખૂબ જ અનુકુળ રહેતી હતી અને રાવલ અને કલ્યાણપુર, ભાટીયાના આજુબાજુના ગામડાઓમાંથી હટાણું કરવા માટે આવતા હોય જેથી એકાએક આ ટની બસ બંધ કરવામાં આવતા હાલાકી ભોગવી રહ્યા છે, આ અંગે જામનગર ડીસી, દ્વારકા ડેપો મેનેજરને પણ અવારનવાર આ બસ ચાલુ કરવા માટે લેખિત, મૌખિક રજૂઆત કરી હોવા છતાં પરિણામ શૂન્ય આવેલ છે.