કોટડા સાંગાણી પોલીસ સ્ટેશનમાં વર્ષ 2009માં નોંધાયેલા દુષ્કર્મોના ગુનામાં 16 વર્ષથી ફરાર આરોપીને રાજકોટ ગ્રામ પેરોલ ફર્લો સ્કોવર્ડની ટીમે દિલ્હીમાંથી ઝડપી લઇ કાયદેસરની કાર્યવાહી કરી હતી.

રાજકોટ રેન્જ આઇ.જી અશોકકુમાર યાદવ અને રાજકોટ જિલ્લા પોલીસવડા હિમકરસિંહની સૂચનાના પગલે જિલ્લા પોલીસ દ્વારા ગંભીર ગુનાઓ આચરી નાસ્તા ફરતા આરોપીઓને તથા પેરોલ જમ્પ કરી ફરાર થયેલા આરોપીઓને ઝડપી લેવા માટે પ્રયત્નશીલ હતી. દરમિયાન એલસીબી પી.આઈ વી.વી. ઓડેદરાના માર્ગદર્શન હેઠળ પેરોલ ફર્લો સ્કોવર્ડના પીએસઆઇ આર.બી. બલદાણીયા તથા તેમની ટીમ તપાસમાં હતી તેવામાં એએસઆઇ નૌસાજભાઈ ચૌહાણ, કોન્સ્ટેબલ મહેન્દ્રસિંહ સોલંકીને એવી માહિતી મળી હતી કે, કોટડા સાંગાણી પોલીસ સ્ટેશનમાં નોંધાયેલા દુષ્કર્મના ગુનામાં ફરાર આરોપી દિલ્હી છે જેથી ટેકનિકલ એનાલિસિસ કરી એક ટીમ દિલ્હી પહોંચી હતી અહીં ભીડભાળ વાળા કરોલબાગ વિસ્તારમાં આરોપી સંદીપ ઉર્ફે સંગીત શ્યામસુંદર ચૌધરી (ઉ.વ 37 રહે ટેન્ક રોડ, બાપાનગર કરોલબાગ દિલ્હી, મુળ હરીનગર તા રાજનગર બિહાર)ને ઝડપી લીધો હતો.

પોલીસે ઝડપાયેલા આરોપીને દિલ્હીથી અહીં લાવી કોટડા સાંગાણી પોલીસને સોપ્યો હતો.

આરોપી સામે વર્ષ 2009માં કોટડા સાંગાણી પોલીસ સ્ટેશનમાં મારામારી અને દુષ્કર્મનો ગુનો નોંધાયા બાદ તે છેલ્લા 16 વર્ષથી નાસ્તો ફરતો હતો તેની સામે સીઆરપીસી કલમ 70 તથા 82 મુજબ વોરંટ પણ ઇસ્યુ કરવામાં આવ્યું હતું.