માઈક્રોસોફ્ટે એક મોટી જાહેરાત કરી છે કે તે 5 મે, 2025 ના રોજ તેની વિડીયો કોલિંગ સેવા સ્કાયપે બંધ કરવા જઈ રહી છે. સ્કાયપે, જે એક સમયે ઈન્ટરનેટ પર વિડીયો કોલિંગમાં સૌથી મોટું નામ હતું, હવે માઈક્રોસોફ્ટ માટે જૂનું થઈ ગયું છે.આથી તેને બંધ કરવાનો નિર્ણય લેવામાં આવ્યો છે. સ્કાયપે બંધ થવાનું સૌથી મોટું કારણ માઇક્રોસોફ્ટનું સંપૂર્ણ ધ્યાન ટીમ્સ પર છે. માઈક્રોસોફ્ટ ટીમ્સ હવે ઓફિસ અને વ્યક્તિગત વાતચીત બંને માટેનું પ્લેટફોર્મ બની ગયું છે, જ્યારે સ્કાયપે હવે તે સ્પર્ધામાં પાછળ રહી ગયું છે. માઈક્રોસોફ્ટ ઈચ્છે છે કે દરેક વ્યક્તિ એક જ જગ્યાએ વાતચીત કરે અને કામ કરે, તેથી જ ટીમ્સને પ્રાથમિકતા આપવામાં આવી રહી છે. તેથી, સ્કાયપેને નિવૃત્ત કરવાનો નિર્ણય લેવામાં આવ્યો છે.

સ્કાયપે વપરાશકર્તાઓને ટીમ્સમાં શિફ્ટ કરવાની તક

સ્કાયપે બંધ થાય તે પહેલાં માઇક્રોસોફ્ટે વપરાશકર્તાઓને ટીમ્સમાં શિફ્ટ થવા માટે પૂરતો સમય આપ્યો છે. મતલબ કે, તમે 5 મે, 2025 સુધી સ્કાયપેનો ઉપયોગ કરી શકો છો, પરંતુ તે પછી તે બંધ થઈ જશે. માઈક્રોસોફ્ટે કહ્યું છે કે આ ફેરફારમાં વપરાશકર્તાઓને સંપૂર્ણ સમર્થન મળશે, જેથી તેઓ કોઈપણ મુશ્કેલી વિના ટીમ્સમાં શિફ્ટ થઈ શકે.

પેઇડ યુઝર્સ આગામી રિન્યુઅલ તારીખ સુધી માન્ય રહેશે

સ્કાયપેના પેઇડ યુઝર્સ માટે પણ કેટલાક ફેરફારો થઈ રહ્યા છે. માઇક્રોસોફ્ટે નવા પેઇડ યુઝર્સ માટે સ્કાયપ ક્રેડિટ અને કોલિંગ પ્લાન વેચવાનું બંધ કરી દીધું છે. પરંતુ જો તમે પહેલાથી જ પેઇડ Skype યુઝર છો, તો તમે તમારી ક્રેડિટ અને સબ્સ્ક્રિપ્શન તમારી આગામી રિન્યુઅલ તારીખ સુધી માન્ય રાખી શકો છો. જોકે, એકવાર તમારું સબ્સ્ક્રિપ્શન સમાપ્ત થઈ જાય, પછી Skype પણ સમાપ્ત થઈ જશે.

ટીમ્સ પર આ રીતે સ્વિચ કરી શકાશે

માઇક્રોસોફ્ટે સ્કાયપેથી ટીમ્સમાં સંક્રમણ સરળ બનાવ્યું છે. સ્કાયપેના પેઇડ યુઝર્સએ હવેથી સ્કાયપે એકાઉન્ટથી ટીમ્સમાં લોગ ઇન કરવાની જરૂર રહેશે. આમ કરવાથી, બધા સંપર્કો, ચેટ્સ અને કોલ્સ સરળતાથી ટીમ્સમાં ટ્રાન્સફર થઈ જશે. ટીમ્સ પર કેલેન્ડર અને અન્ય ટૂલ્સ સાથે વન-ઓન-વન કોલ્સ, ગ્રુપ ચેટ્સ અને ફાઇલ શેરિંગ જેવી સુવિધાઓ પહેલેથી જ ઉપલબ્ધ છે.

ટીમ્સ હવે નવું સ્કાયપે

સ્કાયપે બંધ કરવું એ સરળ નિર્ણય નહોતો, પરંતુ માઇક્રોસોફ્ટે એક નવા અને સુધારેલા પ્લેટફોર્મ તરીકે ટીમ્સ પર સંપૂર્ણપણે ધ્યાન કેન્દ્રિત કરવાનું નક્કી કર્યું છે. હવે માઈક્રોસોફ્ટ ટીમ્સ સ્કાયપે જેવું જ કામ કરશે. સ્કાયપેને અલવિદા કહેવાનો સમય આવી ગયો છે અને માઇક્રોસોફ્ટે ટીમ્સ દ્વારા તેને વપરાશકર્તાઓ સુધી નવી રીતે પહોંચાડવાની તૈયારી કરી લીધી છે.