બોલિવૂડ અભિનેત્રી તાપસી પન્નૂ હાલમાં બોલિવુડની સૌથી વ્યસ્ત હિરોઈનમાંની એક છે. 2019માં તાપસીની બે ફિલ્મો 'સાંઢ કી આંખ' અને 'મિશન મંગલ' રિલીઝ થઈ હતી. જે પછી વર્ષ 2020માં તાપસીની ફિલ્મ 'થપ્પડ' રિલીઝ થઈ હતી. પછી કોરોનાની મહામારીને કારણે થિયેટર બંધ થઈ ગયા હતા. જો કે હવે તાપસી બેક ટુ બેક 4 ફિલ્મોમાં નજર આવશે. દરમિયાન તેની પાંચમી ફિલ્મની પણ જાહેરાત થઈ ગઈ છે.

તાપસી પન્નુ નિર્દેશક અરશદ સઈદની ફિલ્મ 'વો લડકી હૈ કહાં'માં મુખ્ય પાત્ર નિભાવતી જોવા મળશે. જ્યારે પ્રતિક ગાંધી લીડ એક્ટર તરીકે જોવા મળશે. પ્રતિક છેલ્લે સોની લિવ પર રિલીઝ થયેલી 'સ્કેમ 1992'માં નજર આવ્યો હતો. 

'વો લડકી હૈ કહાં?' એક ઈન્વેસ્ટીગેટીવ કોમેડી ફિલ્મ હશે, જે મિડલ ઈન્ડિયામાં સેટ થયેલી છે. આ ફિલ્મમાં તાપસી એક ચુલબુલી પોલીસ અધિકારીનું પાત્ર ભજવતી જોવા મળશે. તો પ્રતિક ગાંધી મહત્વના પાત્રમાં જોવા મળશે.