સ્પેસએક્સે આજે સવારે આંતરરાષ્ટ્રીય અવકાશ મથક (આઇએસએસ) માટે તેનું ક્રૂ-10 મિશન લોન્ચ કર્યું. આ મિશન નાસા અવકાશયાત્રી સુનિતા વિલિયમ્સના પૃથ્વી પર પાછા ફરવા તરફ એક મોટું પગલું છે. ક્રૂ-૧૦ના ચાર અવકાશયાત્રીઓ ક્રૂ-૯ અવકાશયાત્રીઓને મદદ કરશે, જેમાં ફસાયેલા સુનિતા વિલિયમ્સ અને બુચ વિલ્મોરનો સમાવેશ થાય છે.

આ પ્રક્ષેપણ આ અઠવાડિયાની શરૂઆતમાં થવાનું હતું, પરંતુ ટેકનિકલ સમસ્યાઓ અને ત્યારબાદ લોન્ચ વિસ્તારમાં ભારે પવનને કારણે મિશનમાં વિલંબ થયો. ક્રૂ ડ્રેગન કેપ્સ્યુલ વહન કરતું સ્પેસએક્સ ફાલ્કન 9 રોકેટ આજે 4:33 વાગ્યે ભારતીય સમય મુજબ ઉડાન ભરી હતી. આ મિશન નાસાના કોમર્શિયલ ક્રૂ પ્રોગ્રામનો એક ભાગ છે અને તે ચાર નવા અવકાશયાત્રીઓને આઇએસએસ પર લાવશે. આમાં નાસાના એન મેકક્લેન અને નિકોલ આયર્સ, જાક્સાના ટાકુયા ઓનિશી અને રોસકોસ્મોસના કિરિલ પેસ્કોવના નામ સામેલ છે.

જો ફ્લોરિડાના દરિયાકાંઠે હવામાન અનુકૂળ રહે તો, ક્રૂ-9 ટીમ 19 માર્ચ પહેલાં આઇએસએસથી રવાના થવાની અપેક્ષા છે. જૂન 2024માં ઉડાન ભરેલા બોઇંગ સ્ટારલાઇનર અવકાશયાનમાં સમસ્યાઓના કારણે સુનિતા વિલિયમ્સ, બુચ વિલ્મોર સાથે લાંબા સમય સુધી આઇએસએસમાં રહ્યા હતા. પદ સંભાળ્યા પછી યુએસ રાષ્ટ્રપતિ ડોનાલ્ડ ટ્રમ્પે ઇલોન મસ્કને બંને અવકાશયાત્રીઓને પૃથ્વી પર પાછા લાવવાની જવાબદારી સોંપી છે. તેમણે મસ્કને બંને અવકાશયાત્રીઓને શક્ય તેટલી વહેલી તકે પૃથ્વી પર પાછા લાવવા કહ્યું હતું.

સુનિતા વિલિયમ્સ ગયા વર્ષે 5 જૂને આંતરરાષ્ટ્રીય અવકાશ મથક ગયા હતા. તે એક અઠવાડિયા પછી પરત ફરવાની હતી, પરંતુ બોઇંગ સ્ટારલાઇનરમાં સમસ્યાને કારણે, તે ત્યાં જ અટવાઈ ગઈ. બંને અવકાશયાત્રીઓ બોઇંગ અને નાસાના સંયુક્ત ક્રૂ ફ્લાઇટ ટેસ્ટ મિશન પર અવકાશમાં ગયા હતા.