રાજકોટ મહાનગરપાલિકાની ટાઉન પ્લાનિંગ બ્રાન્ચ અને ટાઉન ડેવલપમેન્ટ બ્રાન્ચના વડા તરીકે નિયુક્ત ઇન્ચાર્જ ટાઉન પ્લાનિંગ ઓફિસર કે.આર.સુમરાએ અંતે આજે ચાર્જ સંભાળ્યો હતો. ગત તા.૬-૨-૨૦૨૫ની સાંજે તેમની નિયુક્તિનો હુકમ થયો હતો પરંતુ તત્કાલિન સમયથી જ તેઓ લાંબી રજા ઉપર હોય ૧૭ દિવસ બાદ આજે તા.૨૪ ફેબ્રુઆરીના સવારે તેઓ સેન્ટ્રલ ઝોન કચેરીમાં હાજર થયા હતા. ટીપીઓના ટેબલ ઉપર ફાઇલોના થપ્પા વચ્ચે તેમણે ચાર્જ સંભાળીને કામગીરી શરૂ કરી હતી અને સૌપ્રથમ સ્ટાફ સાથે પરિચય મિટિંગ યોજી હતી.

મહાપાલિકામાં ચાર્જ સંભાળ્યા બાદ આજકાલ દૈનિક સાથેની મુલાકાતમાં તેમણે રાજકોટના વિકાસને આગળ ધપાવવાની નેમ વ્યક્ત કરતા જણાવ્યું હતું કે ટીપીઓની ખુરશી સાથે જ વિકાસની જવાબદારી સંકળાયેલી છે અને તેમને સોંપેલી જવાબદારી તેઓ સુપેરે નિભાવવા કટિબધ્ધ છે. અગાઉ રૂડામાં ટાઉન પ્લાનર તરીકે અને ત્યારબાદ અમરેલી, મોરબી સહિત વિવિધ સ્થળોએ ફરજ બજાવી ચુક્યા હોય તેમજ હાલ પ્રવર કચેરીમાં નગર નિયોજક-૧ તરીકે કાર્યરત હોય ટીપી બ્રાન્ચની કામગીરીનો તેમને સુદીર્ઘ અનુભવ છે. ખાસ કરીને તેઓ નિયમિત કચેરીમાં હાજરી આપશે અને અરજદારોને સાંભળશે તેમ ઉમેર્યું હતું. કઇ કામગીરીને પ્રાયોરિટી આપશો ? તેવા સવાલના પ્રત્યુત્તરમાં તેમણે જણાવ્યું હતું કે મ્યુનિસિપલ કમિશનર સાથે પરામર્શ કર્યા બાદ કામગીરીનું શેડ્યુલ નક્કી કરીશ પરંતુ એકંદરે પેન્ડિંગ કામોના નિકાલને જ પ્રાધાન્ય રહે તે સ્વાભાવિક છે.

અત્રે ઉલ્લેખનીય છે કે રાજકોટમાં અગ્નિકાંડ પૂર્વે નવ વર્ષથી એક જ ટીપીઓ હતા, જ્યારે અગ્નિકાંડ બાદ નવ મહિનામાં ત્રણ ટીપીઓ બદલાયા છે.રાજકોટમાં ટીઆરપી ગેમઝોન અગ્નિકાંડ બાદ ટાઉન પ્લાનિંગ બ્રાન્ચમાં અભૂતપૂર્વ ફેરફારો વચ્ચે શહેરનો વિકાસ ઠપ્પ થઇ ગયા જેવી પરિસ્થિતિ પ્રવર્તી રહી છે. ક્રેડાઇ રાજકોટની સરકાર સુધી રજૂઆતો બાદ ઉપરોક્ત નિર્ણય થયો છે પરંતુ આ નિર્ણય બાદ વિકાસની આગેકૂચ થશે કે સ્થિતિ જૈસે થે રહેશે ? તેના ઉપર બિલ્ડર લોબી સહિત સૌની મીટ મંડાઇ છે.