કેરળની એક સરકારી હોસ્પિટલમાંથી એક વિચિત્ર ઘટના સામે આવી છે. એક 4 વર્ષની બાળકી પોતાની આંગળીના ઓપરેશન માટે આવી હતી પરંતુ ડોક્ટરે ભૂલથી તેની જીભની સર્જરી કરી હતી. સર્જરી બાદ બાળકીના માતા-પિતાએ ડોક્ટર વિરુદ્ધ કેસ દાખલ કર્યો છે. આ બાબતને લઈને સર્વત્ર હોબાળો થતાં સર્જરી કરનાર ડોક્ટરને સસ્પેન્ડ કરી દેવામાં આવ્યા છે.

ડૉક્ટરને ભગવાનનું બીજું સ્વરૂપ માનવામાં આવે છે, જ્યારે 4 વર્ષની બાળકી ડૉક્ટરની બેદરકારીનો શિકાર બની હતી. રિપોર્ટ અનુસાર બાળકીની આંગળી પર સર્જરી કરાવવાની હતી પરંતુ ડોક્ટરે તેની જીભ પર સર્જરી કરી.

જ્યારે આ સમગ્ર મામલે બાળકીના માતા-પિતા સાથે વાત કરવામાં આવી તો તેઓએ જણાવ્યું કે બાળકીની છઠ્ઠી આંગળી કાઢી નાખવાની હતી અને તેથી તેને હોસ્પિટલમાં દાખલ કરવામાં આવી હતી. પરંતુ સર્જરી બાદ બાળકીને ઓપરેશન થિયેટરમાંથી બહાર કાઢવામાં આવી ત્યારે જાણવા મળ્યું કે તેની જીભ પર સર્જરી કરવામાં આવી છે.

જ્યારે માતા-પિતાએ જીભની સર્જરી જોઈ અને ડોકટરોને પૂછ્યું કે આંગળીને બદલે જીભની સર્જરી કેમ કરવામાં આવી તો તેઓએ કહ્યું કે તેના મોંની અંદર એક ફોલ્લો હતો જે કાઢી નાખવામાં આવ્યો હતો. આ કારણોસર જીભની સર્જરીની જરૂર પડી.

તબીબોની બેદરકારી

હોસ્પિટલના અધિકારીઓએ જણાવ્યું હતું કે તે જ દિવસે બે બાળકોની સર્જરી થવાની હતી. તેથી જ ભૂલથી આ છોકરીની જીભની સર્જરી થઈ ગઈ. આ ઘટના બાદ સમગ્ર રાજ્યમાં લોકોમાં ભારે રોષ છે. રાજ્યના આરોગ્ય મંત્રી વીણા જ્યોર્જે મેડિકલ એજ્યુકેશનના નિયામકનો રિપોર્ટ મળ્યા બાદ ડૉ. બિજોન જોન્સનને સસ્પેન્ડ કરી દીધા છે. તેમજ હોસ્પિટલને પ્રોટોકોલનું પાલન કરવા કડક સૂચના આપવામાં આવી છે.

છોકરીના પરિવારની ફરિયાદ બાદ પોલીસે ડોક્ટર વિરુદ્ધ આઈપીસીની કલમ 336 અને 337 હેઠળ કેસ નોંધ્યો છે. દરમિયાન વિપક્ષના નેતા વીડી સતીસને આ સમગ્ર ઘટનાની નિંદા કરી છે.