ઘણીવાર લોકો બજારમાંથી આખા અઠવાડિયા માટે શાકભાજી લાવે છે. આનાથી તેમનો સમય બચે છે. પરંતુ જો ઘણા શાકભાજીનો લાંબા સમય સુધી ઉપયોગ ન કરવામાં આવે તો તે બગડી જાય છે અને સુકાય જાય છે અથવા સડી જાય છે. ત્યારે શાકભાજી સાથે સાથે તમારા પૈસા અને સમય બન્ને બરબાદ થાઇ છે. તેમને રેફ્રિજરેટરમાં યોગ્ય રીતે સંગ્રહિત કરીને તેમને થોડા દિવસો માટે તાજા રાખી શકાય છે અને સડવાથી બચાવી શકાય છે. પરંતુ ભીંડા જેવા ઘણા શાકભાજીઓ છે જેને ખાસ ધ્યાન આપવાની જરૂર છે. ભીંડા ખૂબ જ ઝડપથી બગડે છે. જો ભીંડાને બે દિવસ ફ્રીજમાં કે બહાર રાખો છો તો તે સુકાઈ જાય છે. જો આપ ભીંડા ઘરે લાવ્યા છો, તો તમે તેને સ્ટોર કરવાની યોગ્ય રીત જાણીને તેને બગડતા બચાવી શકો છો. ભીંડાને લાંબા સમય સુધી લીલા અને તાજા રાખવાની સરળ ટિપ્સ વિશે જાણો.

ભીંડા ખરીદતી વખતે આ બાબતોનું રાખો ધ્યાન

ભીંડાને લાંબા સમય સુધી તાજા રાખવા માંગતા હોવ તો ભીંડા ખરીદતી વખતે કેટલીક બાબતોનું ધ્યાન રાખવું સૌથી જરૂરી છે. ભીંડા નરમ હોવા જોઈએ અને તેમાં ઘણા બધા બીજ પણ ન હોવા જોઈએ.

ભીંડા ખરીદતી વખતે તેના કદ અને રંગ પરથી જાણી શકો છો કે તે કૃત્રિમ રીતે ઉછેરવામાં આવે છે કે સ્વદેશી ભીંડા છે. નાની સાઈઝનાં ભીંડાએ સ્વદેશી છે. શ્રેષ્ઠ ભીંડા પુસા એ-4 છે, જે કદમાં મધ્યમ અને ઘેરા લીલા રંગના છે. આ પ્રકારનાં ભીંડામાં ગ્લુટેન ઓછું હોય છે. જેના કારણે તેનો સ્વાદ સારો હોય છે અને તેને ઘણા દિવસો સુધી સ્ટોર કરી શકાય છે.

ભીંડાને સ્ટોર કરવાની ટિપ્સ

ભીંડાને લાંબા સમય સુધી તાજા રાખવા માટે તેને ભેજથી દૂર રાખવા જોઈએ. જ્યારે ભીડા ખરીદો  ત્યારે પહેલા તેને સૂકવી દો જેથી તેના પરનું પાણી સુકાઈ જાય.

ભીંડાને સૂકા કપડામાં લપેટીને હવાચુસ્ત પાત્રમાં રાખો. જેથી ભીંડામાં ભેજ ન આવે. આના કારણે ભીંડા  ઝડપથી બગડતા નથી.

ભીંડાને ફ્રીજમાં રાખવાની ટિપ્સ

જો તમે ફ્રિજમાં ભીંડા રાખતા હોવ તો તેને પોલિથીન કે વેજીટેબલ બેગમાં ભરીને ફ્રીજમાં રાખો. જો તમે પોલીથીનમાં ભીંડા રાખતા હોવ તો તેમાં 1-2 છિદ્રો કરો.

જો તમે ફ્રિજની વેજ બાસ્કેટમાં ભીંડા રાખવા માંગતા હોવ તો પહેલા વેજ બાસ્કેટમાં ન્યૂઝપેપર અથવા પેપર ફેલાવો. પછી એક પછી એક ભીંડા ગોઠવો. આનાથી શાકભાજીમાંથી પાણી કાગળ પર નીકળી જશે.