રાજકોટમાં સ્ટેટ જીએસટીએ રમકડાની પેઢી પર ઓપરેશન હાથ ધર્યું છે. યાજ્ઞીક રોડ પર આવેલા સીમંધર ટોયઝ નામની દુકાનમાં સ્ટેટ જીએસટીએ દરોડા પાડ્યા છે. તેમજ દુકાન સીલ કરવાની કાર્યવાહી કરી છે. 

મોટી કરચોરી કરવામાં આવતી હોવાની બાતમી મળી હતી
યાજ્ઞિક રોડ, સાધુવાસવાણી રોડ ભક્તિનગર સર્કલ, સહિતના સ્થળોએ શોરૂમ અને ગોડાઉન મળી કુલ છ સ્થળે તપાસ હાથ ધરવામાં આવી છે. રમકડાના વેપારી દ્વારા મોટી કરચોરી કરવામાં આવતી હોવાની બાતમી મળતા સ્ટેટ જીએસટીની ટીમે દરોડા પાડ્યા છે. હિસાબી સાહિત્યની ચકાસણી કરવામાં આવી છે. 

ત્રણ દિવસ પહેલા સેન્ટ્રલ જીએસટીએ 200 કરોડથી વધુની કરચોરી પકડી હતી
ત્રણ દિવસ પહેલા સેન્ટ્રલ જીએસટીએ અમદાવાદ, જામનગર અને રાજકોટમાં 25 સ્થળોએ દરોડા પાડીને રૂપિયા 200 કરોડથી વધુની કરચોરી ઝડપી પાડી હતી. સેન્ટ્રલ જીએસટી વિભાગે અમદાવાદમાં સ્ક્રેપ ડીલર ઉપર, જામનગર અને રાજકોટમાં ઓઇલ વેપારીઓને ત્યાં દરોડાની કાર્યવાહી હાથ ધરી હતી. દરોડા દરમિયાન હાથ લાગેલા દસ્તાવેજોના આધારે ટેક્સચોરીનો આંકડો 200 કરોડથી પાર પહોંચ્યો હતો.

બોગસ પરચેસ બિલ અને સેલ્સ ડોક્યુમેન્ટ સહિત ડિજિટલ ડીવાઈસ સહિતનું સાહિત્ય જપ્ત કરાયું હતું. બેઝ ઓઇલ ઇમ્પોર્ટને લઈને તપાસમાં મોટું ટેકસ ફ્રોડ બહાર આવે તેવી શક્યતા હોવાનું સૂત્રોએ જણાવ્યું હતું.