નવી દિલ્હીમાં આજે ઓલિમ્પિક ખેલાડીઓ વિનેશ ફોગાટ અને બજરંગ પુનિયા કોંગ્રેસમાં જોડાયા છે. હરિયાણા વિધાનસભા ચુંટણીમાં વિનેશને જુલાનાથી ટિકિટ મળી શકે છે. વિનેશ અને બજરંગ નવી દિલ્હીમાં કોંગ્રેસ અધ્યક્ષ મલ્લિકાર્જુન ખડગેને પણ મળ્યા હતા. કોંગ્રેસમાં જોડાયા બાદ વિનેશે કહ્યું હતું કે, કેટલીકવાર સખત મહેનતનું ફળ અન્ય ક્ષેત્રોમાં પણ મળે છે.

કોંગ્રેસમાં જોડાતા પહેલા વિનેશ ફોગાટ અને બજરંગ પુનિયા મલ્લિકાર્જુન ખડગેને તેમના દિલ્હીના નિવાસસ્થાને મળ્યા હતા. મીટિંગ બાદ ખડગેએ પોતાના સોશિયલ મીડિયા પર એક ફોટો શેર કર્યો અને લખ્યું, 'ચક દે ઈન્ડિયા, ચક દે હરિયાણા'. મલ્લિકાર્જુન ખડગેએ આગળ લખ્યું કે અમને તમારા બંને પર ગર્વ છે.

વિનેશે કહ્યું કે હું કોંગ્રેસ પાર્ટીનો આભાર માનું છું. જ્યારે અમને રસ્તા પર ખેંચવામાં આવી રહ્યા હતા ત્યારે ભાજપ સિવાય તમામ પક્ષો અમારી સાથે હતા. મને ગર્વ છે કે હું એક એવી પાર્ટીમાં જોડાઈ છું જે મહિલાઓની સાથે છે અને 'શેરીઓથી સંસદ સુધી' લડવા માટે તૈયાર છે.

કોંગ્રેસમાં સામેલ થવા પર વિનેશ ફોગાટે કહ્યું કે હું દેશની દીકરીઓ માટે અવાજ ઉઠાવીશ. ખરાબ સમયમાં તમને ખબર પડે છે કે કોણ તમારી સાથે છે અને કોણ નથી. જ્યારે અમે વિરોધ કરી રહ્યા હતા ત્યારે ભારતીય જનતા પાર્ટીએ અમને સમર્થન આપ્યું ન હતું પરંતુ આજે હું એક નવી શરૂઆત કરી રહી છું.

આજરોજ વિનેશ ફોગાટ અને બજરંગ પુનિયા કોંગ્રેસ પાર્ટીમાં જોડાયા છે. આ પ્રસંગે પાર્ટીના મહાસચિવ કેસી વેણુગોપાલ, પાર્ટીના નેતા પવન ખેડા, હરિયાણા કોંગ્રેસના પ્રમુખ ઉદય ભાન અને AICC હરિયાણાના પ્રભારી દીપક બાબરિયા હાજર હતા.