લઘુતમ તાપમાનના પ્રમાણમાં આજે રાજકોટ સહિત રાજ્યના મોટાભાગના વિસ્તારોમાં વધારો થયો છે. પરંતુ આમ છતાં ઠંડીની તીવ્રતા વધુ હોય તેવી અનુભૂતિ બરફીલા પવનના કારણે લોકો કરી રહ્યા છે. સમગ્ર રાજ્યમાં આજે સૌથી નીચું તાપમાન ગીરનાર પર્વત ઉપર 6.4 ડિગ્રી નોંધાયું હતું. ગિરનાર પર્વત સહિત સમગ્ર જૂનાગઢમાં આજે સવારે વાતાવરણમાં ભેજનું પ્રમાણ 80 ટકા જેટલું રહ્યું છે અને તેના કારણે બરફીલો પવન વધુ તીવ્ર બન્યો હતો. જૂનાગઢમાં પ્રવાસીઓ ધ્રુજી ઉઠ્યા હતા. ભવનાથ તળેટીમાં 9.4 અને જૂનાગઢ શહેરમાં 11.4 ડિગ્રી લઘુતમ તાપમાન આજે નોંધાયું છે.
રાજકોટમાં ગઈકાલે લઘુતમ તાપમાન 12 ડિગ્રી હતું તે આજે 12.8 ડિગ્રી થઈ ગયું છે. વાતાવરણમાં ભેજનું પ્રમાણ 53 ટકા નોંધાયું છે. નલિયામાં ગઈકાલે 10.4 અને આજે 10.5 ડિગ્રી લઘુતમ તાપમાન રહ્યું છે. વડોદરામાં પણ એક ડિગ્રીના વધારા સાથે આજનું લઘુતમ તાપમાન 12.2 ડિગ્રી નોંધાયું છે.

રાજ્યના અન્ય શહેરોના તાપમાનની વાત કરીએ તો આજે ભુજ ભાવનગર પોરબંદર રાજકોટ વેરાવળ સુરેન્દ્રનગર અમદાવાદ ડીસા વડોદરા, સહિત રાજ્યના અનેક શહેરોમાં લઘુતમ તાપમાન ઊંચકાયું છે રાજકોટમાં આજે 12.8 ભુજમાં 12.9 ભાવનગરમાં 15.2 દ્વારકામાં 16.2 ઓખામાં 18.8 પોરબંદરમાં 14.4 વેરાવળમાં 17.4 સુરેન્દ્રનગરમાં 14.8 ડિગ્રી લઘુતમ તાપમાન રહ્યું છે. અમદાવાદમાં 14 ડીસામાં 12.8 વડોદરામાં 12.2 સુરતમાં 14.8 ડિગ્રી લઘુતમ તાપમાન રહ્યું છે. હવામાન ખાતાના જણાવ્યા મુજબ આગામી ત્રણ દિવસમાં લઘુતમ તાપમાનનો પારો ત્રણથી પાંચ ડિગ્રી જેટલો ઉચકાશે. હિમાલયન રિજીયનમાં આજે રાત્રે વધુ એક વેસ્ટર્ન ડિસ્ટર્બન્સ જોવા મળશે અને તેના કારણે પણ ઠંડા પવનો ફુકાવાનું પણ યથાવત રહેશે.