ભાવનગર શહેરના સીદસર ગામેથી જાહેરમાં જુગાર રમતા છ શખ્સોને વરતેજ પોલીસે રોકડ રકમ મોબાઈલ બાઈક સહિત રૂપિયા ત્રણ લાખ દસ હજારના મુદ્દામાલ સાથે ઝડપી લીધા હતા.

 આ બનાવ અંગે જાણવા મળતી વિગતો અનુસાર વરતેજ પોલીસ મથકની ટીમ પોતાના પોસ્ટે વિસ્તારમાં પેટ્રોલિંગમાં હતા. તે દરમિયાન ખાનગી રાહે મળેલી બાતમીના આધારે ભાવનગર શહેર નજીક આવેલા સીદસર ગામે કેટલાક શખ્સો જાહેરમાં જુગાર રમતા હોવાની માહિતી મળી હતી. જે બાતમીના આધારે સીદસર ગામે ભાવનગર રોડ પર આવેલા રખાદાદાના મંદિર પાસે ખુલ્લી જગ્યામાં જુગારની બાજુ માંડીને બેઠેલા છ શખ્સો ઝડપાયા હતા. વરતેજ પોલીસે રેડ કરી કાળુભાઇ શીલુભાઈ ચારોલીયા, મેરૂભાઈ ભીખુભાઈ પરમાર, શંકરભાઈ મનાભાઈ ચારોલીયા, રાજુભાઈ ભીખુભાઈ પરમાર, મનસુખભાઈ મંગાભાઈ વાઘેલા, મંગાભાઈ બદુંડભાઈ વાઘેલા નામના છ શખ્સોને રોકડ રકમ રૂપિયા ૨,૦૧,૨૦૦ તેમજ પાંચ મોબાઇલ, ત્રણ બાઈક મળી કુલ રૂપિયા ૩,૧૬,૨૦૦ ના મુદ્દામાલ સાથે ઝડપી પાડ્યા હતા. અને તમામ વિરુદ્ધ જુગારધારાની કલમ હેઠળ ગુનો દાખલ કરી વરતેજ પોલીસે ધોરણસરની કાર્યવાહી હાથ ધરી હતી.