યુક્રેનની રાજધાની કિવના હોલોસિવસ્કી જિલ્લામાં શનિવારે એક ભયાનક ગોળીબારની ઘટના સામે આવી છે. એક અજ્ઞાત હુમલાખોરે અંધાધૂંધ ફાયરિંગ કરીને બે લોકોની હત્યા કરી દીધી છે, જ્યારે અન્ય પાંચ લોકો ગંભીર રીતે ઘાયલ થયા હોવાના અહેવાલ છે.

કિવના મેયર વિટાલી ક્લિટ્સ્કોએ ટેલિગ્રામ દ્વારા આ ઘટનાની પુષ્ટિ કરતા જણાવ્યું હતું કે, હુમલાખોર હાલ એક સુપરમાર્કેટની અંદર છુપાયેલો છે. પોલીસ અને વિશેષ દળોએ આખા વિસ્તારને ઘેરી લીધો છે અને હુમલાખોરને પકડવા માટે 'સ્પેશિયલ ઓપરેશન' શરૂ કરવામાં આવ્યું છે.

સુપરમાર્કેટમાં હજુ પણ ફાયરિંગ ચાલુ
મેયરના જણાવ્યા અનુસાર હુમલાખોર સુપરમાર્કેટની અંદરથી સતત ગોળીબાર કરી રહ્યો છે. મેડિકલ સ્ટાફે અત્યાર સુધીમાં બે વ્યક્તિઓના મોતના સમાચાર આપ્યા છે. સુરક્ષા દળો અત્યંત સાવચેતીપૂર્વક આગળ વધી રહ્યા છે જેથી સુપરમાર્કેટમાં હાજર અન્ય નિર્દોષ નાગરિકોને બચાવી શકાય. પોલીસ આ હુમલા પાછળનો હેતુ શું છે તેની તપાસ કરી રહી છે. હાલમાં સ્થાનિક લોકોને આ વિસ્તારથી દૂર રહેવાની સલાહ આપવામાં આવી છે.