પાકિસ્તાન ક્રિકેટ ટીમ ચેમ્પિયન્સ ટ્રોફી 2025માંથી બહાર થઈ ગઈ છે. ભારત સામે હાર્યા બાદ યજમાન ટીમ માટે સેમિફાઇનલમાં પહોંચવાનો માર્ગ મુશ્કેલ બન્યો. ન્યુઝીલેન્ડે બાંગ્લાદેશને હરાવ્યું, જેનાથી પાકિસ્તાન અને બાંગ્લાદેશને ટુર્નામેન્ટમાંથી સત્તાવાર રીતે બહાર કરી દેવામાં આવ્યા. પાકિસ્તાનના ભૂતપૂર્વ ખેલાડીઓ પોતાની ટીમ પર ગુસ્સો ઠાલવી રહ્યા છે અને શબ્દોથી તેમના પર હુમલો કરી રહ્યા છે. જેમાં  ભૂતપૂર્વ ક્રિકેટર શોએબ અખ્તરે બાબર આઝમ અને આખી ટીમ પર પ્રહારો કર્યા અને વિરાટ કોહલીનું ઉદાહરણ આપ્યું.


એક ટીવી કાર્યક્રમમાં શોએબ અખ્તરે બાબર આઝમની આકરી ટીકા કરી હતી અને કહ્યું હતું કે તેણે ખોટા રોલ મોડેલ પસંદ કર્યા છે. તેણે કહ્યું કે વિરાટ કોહલીનો રોલ મોડેલ કોણ છે? સચિન તેંડુલકર. તેની (સચિન) પાસે 100 સદી છે. બાબર આઝમનો હીરો કોણ છે? ટુક ટુક ક્રિકેટર (અખ્તરે કોઈ ખેલાડીનું નામ નથી લીધું).
​​​​​​​

​​​​અખ્તરે આગળ કહ્યું કે તો તમે ખોટા હીરો પસંદ કર્યા છે. તમારી વિચારસરણી ખોટી છે. તમે શરૂઆતથી જ ફ્રોડ છો. તમે દોઢ દિવસમાં કહ્યું હતું કે પાકિસ્તાન નંબર 1 બની ગયું છે. તમે ખોટા હીરો પસંદ કર્યા છે. તમે ખોટા લોકોને પ્રોત્સાહન આપ્યું છે.

સોશિયલ મીડિયા પર પાકિસ્તાનની ખૂબ મજાક ઉડાવવામાં આવી રહી છે. લાંબા સમય પછી ટુર્નામેન્ટનું આયોજન કરી રહેલ પાકિસ્તાન તેની શરૂઆતના પાંચ દિવસમાં જ બહાર થઈ ગયું. ભારત સામે 6 વિકેટથી હારનો સામનો કરતા પહેલા પાકિસ્તાનને ન્યુઝીલેન્ડ સામે તેના જ ગ્રાઉન્ડ પર 60 રનથી હારનો સામનો કરવો પડ્યો હતો.

પાકિસ્તાન ગ્રુપ A માં સામેલ છે. તેની સાથે ભારત, ન્યુઝીલેન્ડ અને બાંગ્લાદેશ આ ગ્રુપમાં છે. આ ગ્રુપમાંથી ભારત અને ન્યુઝીલેન્ડ સેમિફાઇનલ માટે ક્વોલિફાય થયા છે.