શહેરના કેવડાવાડીમાં રાત્રીના ગંભીર અકસ્માત સર્જાયો હતો, શેરીમાં 10 મીટરની જગ્યામાં બે સ્પિડ બ્રેકર હોવાથી બાઈક ચાલક યુવકે કાબુ ગુમાવ્યો હતો અને બાઈક થાંભલા સાથે ભટકાતા તરુણનું મોત નિપજયુ હતું જયારે બાઈક ચાલકને ગંભીર ઇજા થવાથી સારવાર માટે ખસેડવામાં આવ્યો છે. મૃતક તરુણ અને ઈજાગ્રસ્ત યુવક બંને માસીયાઈ ભાઈઓ થતા હોય લગ્ન પ્રસંગમાં કેસિયો પાર્ટીમાં વગાડવા માટે ગયા હતા ત્યાંથી પરત ફરતી વખતે અકસ્માત નડ્યો હતો.

બનાવની પ્રાપ્ત વિગત મુજબ શહેરના કેવડાવાડીમાં રહેતો સુમિત રાકેશભાઈ પરમાર (ઉ.વ.20) અને માસીસાઈ ભાઈ પરેશ મુકેશભાઈ શેખલીયા (ઉ.વ.14) બંને ગત રાત્રીના બાઈક લઈને ઘરે જઈ રહ્યા હતા ત્યારે કેવડાવાળી શેરી નં-8માં એક પછી એક એમ બે સ્પિડ બ્રેકર આવતા અંધારામાં ધ્યાન પડતા ચાલક સુમિતે બાઈક પરનો કાબુ ગુમાવી દીધો હતો અને બાઈક સમેત બંને થાંભલામાં ધડાકાભેર અથડાતા ત્યાંજ ઢળી પડ્યા હતા. દરમિયાન પસાર થતા રાહદારીએ લોહી લુહાણ હાલતમાં બંનેને જોતા તાકીદે 108ને ફોન કરતા સિવિલ હોસ્પિટલમાં ખસેડવામાં આવ્યા હતા જ્યાં ફરજ પરના તબીબે પરેશને મૃત જાહેર કર્યો હતો અને સુમિતને ગંભીર ઇજા થવાથી દાખલ કરવામાં આવ્યો હતો. બનાવની જાણ હોસ્પિટલ ચોકીના સ્ટાફે ભક્તિનગર પોલીસને કરતા પોલીસ સ્ટાફએ હોસ્પિટલ પહોંચી જરૂરી કાર્યવાહી કરી હતી. ઘટનાની જાણ થતા બંનેના પરિવારજનો પણ હોસ્પિટલએ દોડી આવ્યા હતા. જ્યાં પુત્રના મૃતદેહને જોતા ઘેરો કલ્પાંત સર્જાયો હતો.

મૃત્યુ પામનાર પરેશ પાંચ બહેનમાં ત્રીજા નંબરે અને એકનો એક ભાઈ હતો. બંને રાત્રીના ભગવતીપરામાં લગ્ન પ્રસંગ હોવાથી કેસિયો પાર્ટીમાં વગડાવા માટે ગયા હતા ત્યાંથી પરત ફરતી વખતે ટૂંકા અંતરે બે સ્પિડ બ્રેકર આવતા બાઈક પરનો કાબુ ગુમાવ્યો હતો. આધરસ્તભ પુત્રના મોતથી પરિવારમાં શોક છવાયો છે. આગળની કાર્યવાહી ભક્તિનગર પોલીસે હાથ ધરી છે.