રાજકોટ મ્યુનિસિપલ કમિશનર આનંદ પટેલના આદેશથી સોલિડ વેસ્ટ મેનેજમેન્ટ શાખાની ટીમ ઉપલાકાંઠે ત્રાટકી હતી અને જાહેરમાં ગંદકી ફેલાવવા બદલ ઉપલાકાંઠે શકિત ટી સ્ટોલ અને ગમારા પાન નામની બે દુકાનો સીલ કરવામાં આવી હતી.વિશેષમાં રાજકોટ મહાપાલિકાના ચીફ પર્યાવરણ ઇજનેરએ વિગતો જાહેર કરતા જણાવ્યું હતું કે, રાજકોટ શહેરમાં ઉપલાકાંઠે ભાવનગર રોડ ઉપર પટેલ પાન પાસેના શકિત ટી સ્ટોલ અને ગમારા પાન દ્રારા જાહેરમાં સ્વચ્છતા જાળવતા ન હોવાથી અને ગંદકી સબબ ન્યુસન્સ ફેલાવતા હોવાથી જાહેર આરોગ્યને નુકસાન કરે તે રીતે જાહેર ગંદકી તેમજ કચરો કરવામાં આવતો હોય, આ બાબતે નોટીસ આપી વહીવટી ચાર્જની વસુલાત કરવામાં આવી હતી. આ ઉપરાંત આ શોપના સંચાલકોને જાહેરમાં ગંદકી ન કરવા તેમજ સ્વચ્છતા જાળવવા અવાર–નવાર સુચના આપવામાં આવેલ. તેમ છતાં જાહેર સ્વચ્છતા ન જળવતા તા.૯–૪–૨૦૨૪ના રોજ સ્થળ તપાસ કરતાં શોપની આસપાસ ખુબજ ગંદકી તેમજ કચરો જોવા મળેલ હતો. જેથી તા. ૯–૪–૨૦૨૪ના શકિત ટી સ્ટોલ અને ગમારા પાન સંચાલકોને નોટીસ આપીને ધી જીપીએમસી એકટ–૧૯૪૯ની કલમ–૩૭૬–એ હેઠળ સીલ કરવાની કાર્યવાહી કરવામાં આવી હતી. જાહેરમાં ગંદકી ફેલાવતાં આસામીઓ તેમજ ધંધાર્થીઓને નોટીસ આપી વહીવટી ચાર્જ વસુલવા તેમજ તેમાં સુધારો ન જણાતા આવા આસામીઓ–ધંધાર્થીઓ સામે તેની દુકાન–ધંધાનું એકમ સીલ કરવા સુધીના આકરા પગલાં લેવામાં આવશે. જે બાબતે નોંધ લેવા જાહેર જનતાને સુચિત કરવામાં આવે છે