ભારતીય શેરબજાર માટે જે બીક હતી એ જ આજે થયું અને શેરબજાર ખુલતાની સાથે જ ઊંઘેકાંધ પડ્યું હતું. સેન્સેક્સ ખુલતાની સાથે જ 400 પોઈન્ટ ડાઉન ગયો તો બીજી તરફ નબળા વૈશ્વિક સંકેતો વચ્ચે નિફ્ટી પણ 22000ની નીચે સરક્યો હતો. નેશનલ સ્ટોક એક્સચેન્જનો નિફ્ટી-50 પણ સેન્સેક્સની સાથે 150 પોઈન્ટથી વધુ ઘટ્યો. અમેરિકાના રાષ્ટ્રપતિ ડોનાલ્ડ ટ્રમ્પ દ્વારા કેનેડા અને મેક્સિકો પર ટેરિફ લાદવાની જાહેરાત બાદ અમેરિકાના બજારો તેમજ એશિયન બજારોમાં અંધાધૂંધી ફેલાઈ ગઈ હતી અને ભારતીય બજાર પણ આનાથી ડરી ગયું હોય અને તેની અસર અહી પહોચી હોય તેવું લાગતું હતું.

અમેરિકામાં તીવ્ર ઘટાડાથી લઈને એશિયન બજારોમાં નકારાત્મક વૈશ્વિક સૂચકાંકો વચ્ચે, ભારતીય શેરબજારના પતન વિશે આગાહીઓ પહેલાથી જ કરવામાં આવી રહી છે. મંગળવારે શેરબજાર ખુલતાની સાથે જ, સેન્સેક્સ 72,817.34 ના સ્તરે ખુલ્યો, જે તેના અગાઉના બંધ 73,085 થી 268 પોઈન્ટ નીચે હતો, અને થોડીવારમાં ઘટાડો વધુ તીવ્ર બન્યો. સમાચાર લખાઈ રહ્યા હતા ત્યારે, સેન્સેક્સ 400 થી વધુ પોઈન્ટ ઘટીને 72,633 ના સ્તરે પહોંચી ગયો હતો.

સેન્સેક્સની જેમ,એનએસઈ નિફ્ટીએ પણ શરૂઆતમાં ઘટાડો જોયો અને 22,000 ની નીચે ખુલ્યો, જે તેના પાછલા ટ્રેડિંગ દિવસના 22,119.30 ના બંધ સ્તરથી નીચે ગયો. નિફ્ટી-50 એ 21,974.45 ના સ્તરે ટ્રેડિંગ શરૂ કર્યું.

વિદેશી શેરબજારમાં મંદીના સંકેતો પહેલાથી જ હતા

વિદેશી બજારોમાંથી શેરબજારમાં મંદીના સંકેતો પહેલાથી જ મળી રહ્યા હતા. સોમવારે, ડાઉ જોન્સથી લઈને એસ&પી સુધી, બધા રેડ ઝોનમાં બંધ થયા. ડાઉ જોન્સ ૧.૪૮% ઘટીને ૪૩,૧૯૧.૨૪ પર બંધ થયો, તો બીજી તરફ એસ&પી ૧.૭૬% ઘટીને ૫૮૪૯.૭૨ પર બંધ થયો. આ ઉપરાંત, જો આપણે નાસ્ડેક વિશે વાત કરીએ, તો આ ઇન્ડેક્સ 2.64% અથવા 497.09 પોઈન્ટના ઘટાડા સાથે 18,350.19 પર બંધ થયો.