સૌરાષ્ટ્ર યુનિવર્સિટી સંલગ્ન કોલેજોમાં ફાઇનલ સેમેસ્ટર ની પરીક્ષાઓ આવતીકાલથી શરૂ થઈ રહી છે. અગાઉ સામાન્ય રીતે ઓછામાં ઓછા 10 થી 15 દિવસ અગાઉ પરીક્ષાના શેડ્યુલ જાહેર કરી દેવાતા પરંતુ આ વખતે માત્ર 24 કલાક અગાઉ શેડ્યુલ જાહેર કરવામાં આવેલ છે. પરીક્ષા વિભાગના વર્તુળોના જણાવ્યા મુજબ એમએ ઇંગલિશ સહિતના ત્રણ કોર્સમાં અભ્યાસક્રમો પૂરા થયા ન હોવાથી પરીક્ષા પાછળ લઈ જવાની માગણી વિદ્યાર્થીઓ દ્વારા વ્યાપક પ્રમાણમાં કરવામાં આવી હતી. વિદ્યાર્થીઓની રજૂઆત સાચી હોવાથી આ ત્રણ પરીક્ષાઓ શેડ્યુલ માંથી કાઢી નાખવામાં આવી છે અને બાકીની પરીક્ષાઓ કાલથી શરૂ થશે.

જુદા જુદા 32 કોર્સની આવતીકાલથી શરૂ થતી પરીક્ષામાં 44,254 વિદ્યાર્થીઓ નોંધાયા છે અને 180 કેન્દ્રમાં પરીક્ષા લેવામાં આવશે. જ્યાં પરીક્ષાનું કેન્દ્ર છે ત્યાં સીસીટીવી કેમેરા ફરજિયાત બનાવવામાં આવ્યા છે એટલું જ નહીં આવા કેન્દ્રના સંચાલકોએ પોતાની માલિકીના કેમેરા જ વસાવવા પડશે અને ભાડે લીધેલા કેમેરા ચાલશે નહીં તેવો પણ આદેશ સૌરાષ્ટ્ર યુનિવર્સિટી દ્વારા કરવામાં આવ્યો છે.

પરીક્ષાના રેકોર્ડિંગ જ્યારે યુનિવર્સિટી દ્વારા માગવામાં આવતા હોય છે ત્યારે આ સમયગાળા દરમિયાન અમારે ત્યાં વીજળી પુરવઠો ખોરવાઈ ગયો હતો તેવા જવાબો અનેક કિસ્સાઓમાં મળ્યા પછી યુનિવર્સિટીએ આ બાબતમાં પણ નવો પરિપત્ર કરીને સ્પષ્ટ શબ્દોમાં જણાવ્યું છે કે જો વીજળી પુરવઠો ખોરવાય તો પીજીવીસીએલને લેખિતમાં ફરિયાદ કરવી પડશે અને તેની નકલ યુનિવર્સિટીને આપવી પડશે.

આવતીકાલથી આર્ટસ મેનેજમેન્ટ કોમર્સ સાયન્સ હોમ સાયન્સ એજ્યુકેશન અને કોમ્પ્યુટર સાયન્સ ની પરીક્ષાઓ લેવામાં આવશે. સેમેસ્ટર ચાર અને છ ની મોટાભાગે પરીક્ષાઓ છે પરંતુ અમુક કિસ્સાઓમાં ચોથા સેમેસ્ટર ની પરીક્ષાઓ અને પહેલા સેમેસ્ટર ની પરીક્ષાઓ પણ યોજવામાં આવી છે.