અજાણ્યા શખ્સો વૃદ્ધની હત્યાનીપજાવીને ફરાર: પોલીસ તપાસનો ધમધમાટ

દ્વારકા તાલુકાના લાડવા ગામે રહેતા આશરે 59 વર્ષના એક સતવારા વૃદ્ધ પર કોઈ અજાણ્યા શખ્સોએ ગુરુવારે રાત્રે હુમલો કરી, હત્યા નિપજાવ્યાનો બનાવ પ્રકાશમાં આવ્યો છે.

આ સમગ્ર પ્રકરણ અંગે પોલીસ સૂત્રો દ્વારા જાણવા મળતી વિગત મુજબ દ્વારકાથી આશરે ત્રણ કિલોમીટર દૂર આવેલા લાડવા ગામની સીમમાં રહેતા અને એક ખેતરમાં રખોપું કરતા મોહનભાઈ ભીમાભાઈ સોનગરા નામના આશરે 59 વર્ષના સતવારા વૃદ્ધનો લોહી નીતરતો મૃતદેહ લાડવા ગામની વાડીમાં ખાટલા પરથી સાંપળ્યો હતો. ગુરુવારે મોડી રાત્રિના સમયે કોઈ અજાણ્યા શખ્સોએ મોહનભાઈ સોનગરા ઉપર કોઈ અગમ્ય કારણોસર બોથડ પદાર્થ વડે જીવણ હુમલો કરી, માથામાં ગંભીર ઈજાઓ પહોંચાડતા તેમનું ઘટના સ્થળે જ કરુણ મૃત્યુ નીપજ્યું હોવાનું જાહેર થયું છે.

આ બનાવ અંગે શુક્રવારે સવારે દ્વારકા પોલીસને જાણ કરવામાં આવતા પોલીસ સ્ટાફ ઘટના સ્થળે દોડી ગયો હતો અને લાશનો કબજો મેળવી, દ્વારકાની સરકારી હોસ્પિટલમાં પોસ્ટમોર્ટમ માટે મોકલી આપવામાં આવ્યો હતો. મૃતક વૃદ્ધને બે પુત્રો હોવાનું અને તેઓ લાડવા ગામે ખેતરનું ખેતીકામ કરતો હોવાનું પણ જાણવા મળ્યું છે.

રાત્રિના સમયે ઉપરોક્ત વૃદ્ધ પર કોઈ અજાણ્યા શખ્સોએ શા કારણે હુમલો કર્યો તેમજ આ હત્યામાં સંડોવાયેલા શખ્સોને ઝડપી લેવા માટે અહીં ડી.વાય.એસ.પી. પણ ઘટના સ્થળે પહોંચી ગયા હતા. આ પ્રકરણ અંગે મૃતકને પુત્ર સતીશ મોહનભાઈ સોનગરા (ઉ.વ. 32) ની ફરિયાદ પરથી દ્વારકાના પી.આઈ. ટી.સી. પટેલ તથા સ્ટાફ દ્વારા વિવિધ દિશાઓમાં તપાસના ચક્રો ગતિમાન કરવામાં આવ્યા છે.