વેલકમ ટુ ધ જંગલમાં અમુક સીન શૂટ કર્યા પછી સંજયે ફિલ્મ છોડી

અક્ષય કુમારની મલ્ટી-સ્ટારર ફિલ્મ 'વેલકમ ટુ ધ જંગલ'માંથી સંજય દત્ત બહાર થઈ ગયા હતા. હવે ડાયરેક્ટરે પોતે આ પાછળનું કારણ જણાવ્યું છે. સંજય દત્તે ફિલ્મના પોતાના ભાગનું શૂટિંગ પણ કરી લીધું હતું, પરંતુ પછી તેમણે પોતાનો રોલ સુનિલ શેટ્ટીને આપી દીધો.અક્ષય કુમારની મલ્ટી-સ્ટારર ફિલ્મ 'વેલકમ ટુ ધ જંગલ' આ સમયે થિયેટરોમાં સારી કમાણી કરી રહી છે. 30 થી વધુ કલાકારો ધરાવતી આ ફિલ્મને ઓડિયન્સ થિયેટરોમાં એન્જોય કરી રહી છે. આ ફિલ્મમાં સંજય દત્ત પણ મહત્વનો રોલ ભજવવાના હતા. ફિલ્મના ટીઝર વીડિયોમાં પણ એક્ટરને જોવામાં આવ્યા હતા, પરંતુ જ્યારે ફિલ્મ બનીને તૈયાર થઈ ત્યારે સંજય દત્ત તેમાં નહોતા. હવે આ ફિલ્મમાંથી તેમના બહાર થવાનું કારણ સામે આવ્યું છે. 'વેલકમ ટુ ધ જંગલ'ના ડાયરેક્ટર અહેમદ ખાને તાજેતરમાં જ જણાવ્યું કે આખરે કેમ સંજય દત્તને શૂટિંગ કર્યા પછી પણ આ ફિલ્મ છોડવી પડી. અહેમદ ખાને કહ્યું કે, સંજય દત્તને સ્ક્રિપ્ટ ગમી હતી અને તેઓ આ ફિલ્મનો હિસ્સો બનવા માંગતા હતા. ફિલ્મમાં તેમના ઘણા બધા મિત્રો હતા - જેકી શ્રોફ, અક્ષય કુમાર. તેઓ ખુશ હતા અને અમે તેમની સાથે ફિલ્મના કેટલાક સીન શૂટ પણ કરી લીધા હતા. પરંતુ ત્યારબાદ તેમની ડેટ્સ (સમય) ની સમસ્યા નડી ગઈ. તેમને ઈલાજ માટે અમેરિકા જવું પડ્યું અને હું આટલા બધા કલાકારોની ડેટ્સ આગળ-પાછળ શિફ્ટ કરી શકું તેમ નહોતો.
અહેમદ ખાને આગળ જણાવ્યું કે સંજય દત્ત જ્યારે આ ફિલ્મમાંથી બહાર થયા ત્યારે તેઓ ફિલ્મની મદદ કરીને ગયા. તેમણે પોતાના રોલ માટે સુનિલ શેટ્ટી અને જેકી શ્રોફના નામનું સૂચન કર્યું જેથી શૂટિંગ ન અટકે. ડાયરેક્ટરે જણાવ્યું કે સંજય દત્તે પોતે સુનિલ શેટ્ટીને ફોન કર્યો અને આ રોલ ભજવવા માટે કહ્યું. આ પછી જેકી શ્રોફને કહેવામાં આવ્યું કે તેમને એ રોલ કરવાનો છે જે પહેલા સુનિલ શેટ્ટી કરવાના હતા. આ રીતે સંજય દત્તે ફિલ્મમાંથી પોતાના એક્ઝિટનું નુકસાન થવા ન દીધું.
'વેલકમ ટુ ધ જંગલ'ની વાત કરીએ તો આ ફિલ્મમાં 30 થી વધુ એક્ટર્સ જોવા મળી રહ્યા છે. ફિલ્મમાં અક્ષય કુમાર, જેકી શ્રોફ, સુનિલ શેટ્ટી ઉપરાંત દિશા પાટની, અરશદ વારસી, જેકલીન ફર્નાન્ડીઝ, રવીના ટંડન, પરેશ રાવલ, લારા દત્તા, ફરીદા જલાલ, જોની લીવર, રાજપાલ યાદવ, શ્રેયસ તલપડે, તુષાર કપૂર, કૃષ્ણા અભિષેક, કીકુ શારદા, આફતાબ શિવદાસાની, ઝાકિર હુસૈન, બ્રિજેન્દ્ર કાલા, યશપાલ શર્મા, મુકેશ તિવારી, વિન્દુ દારા સિંહ, ઉર્વશી રૌતેલા, પંકજ ધીર (જેમણે પોતાના નિધન પહેલા ફિલ્મ શૂટ કરી હતી), પુનીત ઈસ્સર અને સુદેશ બેરી સહિત અન્ય કેટલાય કલાકારો સામેલ છે.
બોક્સ ઓફિસ કલેક્શનની વાત કરીએ તો ફિલ્મે 5 દિવસમાં 81 કરોડની કમાણી કરી લીધી છે. આ વીકેન્ડ પહેલા ફિલ્મ 100 કરોડનો આંકડો પાર કરી શકે છે. ટ્રેલર જોયા પછી ઓડિયન્સ તરફથી મિશ્ર પ્રતિસાદ મળ્યો હતો, પરંતુ ફિલ્મ બોક્સ ઓફિસ પર સારી કમાણી કરી રહી છે. ગઈકાલે એટલે કે મંગળવારે આ ફિલ્મે નેટ 9.25 કરોડનો બિઝનેસ કર્યો હતો.