યુક્રેનમાં શાંતિ કરારો પર સામાન્ય ચર્ચા વચ્ચે, રશિયાએ એક મોટો મિસાઇલ અને ડ્રોન હુમલો કર્યો છે. ઉત્તરીય યુક્રેનિયન શહેર ડોબ્રોપિલિયા પર રશિયન દળો દ્વારા રાતોરાત કરવામાં આવેલા હુમલામાં પાંચ બાળકો સહિત 14 લોકો માર્યા ગયા છે. આ ઉપરાંત 37 લોકો ઘાયલ પણ થયા છે. રશિયન દળો ડોનેટ્સક ક્ષેત્રમાં વારંવાર હુમલા કરી રહ્યા છે, અને ડોનબાસ પ્રદેશ પર કબજો કરવાની તૈયારી કરી રહ્યા છે.

ગઈકાલે રાત્રે રશિયન સેનાએ બેલિસ્ટિક મિસાઇલો, અનેક રોકેટ અને ડ્રોનથી હુમલો કર્યો હોવાના અહેવાલ છે, જેમાં આઠ બહુમાળી ઇમારતો જમીનદોસ્ત થઈ ગઈ હતી. આ હુમલામાં લગભગ 30 વાહનોનો નાશ થયો હતો. આ હુમલામાં પાંચ બાળકો સહિત ૧૪ લોકો માર્યા ગયા છે અને ૩૭ લોકો ઘાયલ થયા છે. યુક્રેનિયન મંત્રાલયે એમ પણ કહ્યું કે ખાર્કિવ ક્ષેત્રમાં થયેલા બીજા હુમલામાં ત્રણ લોકો માર્યા ગયા છે.

'પુતિનના ઉદ્દેશ્યો બદલાયા નથી'
શાંતિ મંત્રણા વચ્ચે રશિયન હુમલાઓ પર, યુક્રેનિયન રાષ્ટ્રપતિ ઝેલેન્સકીએ ફેસબુક પર કહ્યું, "આવા હુમલાઓ દર્શાવે છે કે રશિયાના ઉદ્દેશ્યો બદલાયા નથી. આથી, જીવનની સુરક્ષા માટે, આપણા હવાઈ સંરક્ષણને મજબૂત બનાવવા અને રશિયા સામે પ્રતિબંધો વધારવા માટે આપણા શ્રેષ્ઠ પ્રયાસો ચાલુ રાખવા મહત્વપૂર્ણ છે. પુતિનને યુદ્ધમાં નાણાં પૂરા પાડવામાં મદદ કરતી દરેક વસ્તુનો અંત લાવવો જોઈએ."

અમેરિકા સાથે ફરી વાતચીત ચાલી રહી છે
અન્ય એક સોશિયલ મીડિયા પોસ્ટમાં, ઝેલેન્સકીએ કહ્યું કે, તેઓ અમેરિકા અને ડોનાલ્ડ ટ્રમ્પ વહીવટી તંત્ર સાથે કરારો પર ચર્ચા કરી રહ્યા છે. અમે એવા ભાગીદારો સાથે કામ કરવાનું ચાલુ રાખીએ છીએ જે શાંતિ ઇચ્છે છે, જેમ અમે કરીએ છીએ અને જરૂરી પગલાં પર ધ્યાન કેન્દ્રિત કરીએ છીએ. આવતા અઠવાડિયે, યુરોપમાં, યુનાઇટેડ સ્ટેટ્સ સાથે અને સાઉદી અરેબિયામાં ઘણું કામ થશે. અમે શાંતિને વેગ આપવા અને સુરક્ષાના પાયાને મજબૂત બનાવવા માટે એક બેઠકની તૈયારી કરી રહ્યા છીએ. 

ઝેલેન્સકીએ એમ પણ કહ્યું, આજે, રાષ્ટ્રપતિ ટ્રમ્પની ટીમ સાથે વિવિધ સ્તરે સઘન કાર્ય ચાલી રહ્યું છે. ઘણા કોલ આવ્યા છે. મુદ્દો સ્પષ્ટ છે. શક્ય તેટલી વહેલી તકે શાંતિ શક્ય તેટલી વિશ્વસનીય સુરક્ષા. યુક્રેન આ માટે સંપૂર્ણપણે પ્રતિબદ્ધ છે. હું મદદ કરી રહેલા દરેકનો આભાર માનું છું.