રિલાયન્સના ચેરમેન અને મેનેજિંગ ડિરેક્ટર મુકેશ અંબાણીએ દિલ્હીમાં આયોજિત 'રાઇઝિંગ નોર્થઈસ્ટ ઇન્વેસ્ટર્સ સમિટ' દરમિયાન આ જાહેરાત કરી હતી. મુકેશ અંબાણીએ ઓપરેશન સિંદૂર અને આર્મ ફોર્સની પણ પ્રશંસા કરી. પોતાના નિવેદનમાં, તેમણે ઉત્તર પૂર્વ રાજ્યો માટે છ મોટી જાહેરાતો કરી અને જણાવ્યું કે આજે હું અરુણાચલ પ્રદેશ, આસામ, મણિપુર, મેઘાલય, મિઝોરમ, નાગાલેન્ડ, સિક્કિમ અને ત્રિપુરાના મુખ્યમંત્રીઓ સમક્ષ છ પ્રતિબદ્ધતાઓ રજૂ કરું છું.

મુકેશ અંબાણીએ જણાવ્યું હતું કે રિલાયન્સ ઇન્ડસ્ટ્રીઝ આગામી 5 વર્ષમાં રૂ. 75,000 કરોડના લક્ષ્ય સાથે આ ક્ષેત્રમાં તેના રોકાણને બમણાથી વધુ કરશે. છેલ્લા 40 વર્ષમાં આ ક્ષેત્રમાં 30 હજાર કરોડ રૂપિયાનું રોકાણ થયું છે. અંબાણીએ કહ્યું કે આ રોકાણથી 25 લાખથી વધુ પ્રત્યક્ષ અને પરોક્ષ રોજગારની તકો ઉભી થશે.

જિયો એઆઈ લાવશે

આ પ્રદેશમાં 5 મિલિયનથી વધુ 5જી ગ્રાહકો સાથે 90 ટકા કવરેજ ધરાવતું જીઓ , આવતા વર્ષે આ સંખ્યા બમણી કરશે. મુકેશ અંબાણીએ કહ્યું, 'જીઓની પ્રાથમિકતા બધી શાળાઓ, હોસ્પિટલો, સાહસો અને ઘરોમાં એઆઈની ક્રાંતિકારી શક્તિ લાવવાની રહેશે.

ખેડૂતોની આવક વધશે

રિલાયન્સ રિટેલ મુખ્ય ખાદ્ય પદાર્થો, ફળો અને શાકભાજીની ખરીદી વધારશે, જેનાથી ખેડૂતોની આવકમાં વધારો થશે. કંપની ઉચ્ચ-ગુણવત્તાવાળા એફએમસીજી ઉત્પાદનો અને પ્રદેશના કારીગર અર્થતંત્ર માટે ફેક્ટરીઓમાં પણ રોકાણ કરશે.

બાયોગેસ પ્લાન્ટ અને કેન્સર હોસ્પિટલ

રિલાયન્સ આ પ્રદેશમાં સૌર ઉર્જા ઉત્પાદન વધારશે અને 350 બાયોગેસ પ્લાન્ટ સ્થાપીને પ્રદેશની વિશાળ ઉજ્જડ જમીનને 'ધન-ભૂમિ'માં રૂપાંતરિત કરશે. રિલાયન્સ ફાઉન્ડેશન ઉત્તરપૂર્વમાં 'અંતિમ કેન્સર સંભાળ' લાવશે. 'શરૂઆતમાં, અમે મણિપુરમાં 150 બેડની વ્યાપક કેન્સર હોસ્પિટલની સ્થાપના કરી છે. અમે જીનોમિક ડેટાનો ઉપયોગ કરીને સ્તન કેન્સરની સંભાળ માટે મિઝોરમ યુનિવર્સિટી સાથે સહયોગ કરી રહ્યા છીએ. ગુવાહાટીમાં, અમે એક અદ્યતન મોલેક્યુલર ડાયગ્નોસ્ટિક્સ અને સંશોધન પ્રયોગશાળા બનાવી છે.

રિલાયન્સે તાલીમ કેન્દ્રો બનાવ્યા

તેમણે કહ્યું કે, અમે પૂર્વોત્તરને આરોગ્યસંભાળ કેન્દ્ર અને સંશોધન કેન્દ્રમાં પરિવર્તિત કરવામાં મદદ કરીશું. તેમણે ઉમેર્યું કે, રિલાયન્સ ફાઉન્ડેશન ભવિષ્યના ચંદ્રક વિજેતાઓને તૈયાર કરવા માટે આઠ રાજ્યોમાં ઓલિમ્પિક તાલીમ કેન્દ્રો સ્થાપશે.