રાજકોટ મહાનગરપાલિકા દ્રારા આજે તા.૨૦થી તા.૨૫ મે સુધી રાજકોટ શહેરનું મહત્તમ તાપમાન ૪૫ ડીગ્રી કે તેથી વધુ રહેશે તેવી જાહેરાત કરવાની સાથે રાજકોટ શહેરમાં આજથી પાંચ દિવસ માટે હિટવેવનું રેડ એલર્ટ જાહેર કરવામાં આવ્યું છે, ખાસ કરીને શહેરીજનોને બપોરે ૧૨થી ૪ વાગ્યા સુધી બિનજરી બહાર નહીં નીકળવા અપીલ કરાઇ છે.
વિશેષમાં રાજકોટ મહાનગરપાલિકાના આરોગ્ય અધિકારી દ્રારા આજે બપોરે એવા મતલબની સત્તાવાર જાહેરાત કરવામાં આવી છે કે તેમને મોસમ વિજ્ઞાન કેન્દ્ર– અમદાવાદ તરફથી તા.૧૯–૫–૨૦૨૪ના રોજ મળેલી આગાહી મુજબ આજે તા.૨૦–૫–૨૦૨૪થી આગામી તા.૨૫–૫–૨૦૨૪ સુધી રાજકોટ શહેરનું મહત્તમ તાપમાન ૪૫ ડીગ્રી સુધી પહોંચશે.આથી રાજકોટ શહેરમાં આજથી હિટવેવનું રેડ એલર્ટ જાહેર કરવામાં આવે છે તેમજ રાજકોટના તમામ શહેરીજનો માટે આરોગ્યલક્ષી ગાઇડ લાઇન જાહેર કરવામાં આવી છે તેનું પાલન કરવા અનુરોધ કરવામાં આવે છે