રાજકોટના યવાન રમેશ ડાંગરેચિયાની લગ્નની લાલચ આપી દાહોદમાં હત્યા કરાઈ હોવાની ઘટના સામે આવી છે. પહેલા 10 લાખની ખંડણી માગી અને પછી રમેશને બેફામ માર મારી મોતને ઘાટ ઉતાર્યો હતો. બાદમાં લાશ ખેતરમાં ફેંકી દેવામાં આવી હતી. જોકે, પોલીસે ગણતરીની કલાકોમાં એક મહિલા સહિત ત્રણ આરોપીની ધરપકડ કરી લીધી હતી.  

રમેશે આ માંગણી નકારી દીધી હતી

મળતી માહિતી પ્રમાણે, રમેશ રાજકોટના કાગદડી ગામમાં ગેરેજ ચલાવતો હતો. તેમના 14 વર્ષ પહેલા છૂટાછેડા થયા હતા. તેમને 15 વર્ષની એક પુત્રી છે. લીંબડી ગામના મજૂરો સાથે મિત્રતા થયા બાદ આરોપીઓએ તેમનો લાભ લીધો હતો. 15 દિવસ પહેલા પ્રવીણ અને સુનીતાબેને લગ્નની વાત કરી હતી. તેમણે 2.5 લાખ રૂપિયા અને ચાંદીની માંગણી કરી હતી. રમેશે આ માંગણી નકારી દીધી હતી. આરોપીઓએ 7 મે, 2025ના રોજ રમેશને લીંબડી બોલાવ્યો હતો.

પછી તેને ખેતરમાં ફેંકી દીધો 

8 મેના બપોરે રમેશ લીંબડી પહોંચ્યો ત્યારે આરોપીઓએ 10 લાખની ખંડણી માગી હતી. રમેશે બહેનને જાણ કરી હતી. બહેને રાજકોટ પોલીસને આ અંગે જાણ કરી હતી. આરોપીઓએ રમેશને ચાકલિયા ગામે ગોંધી રાખી મારપીટ કરી હતી. પછી તેને ખેતરમાં ફેંકી દીધો હતો.

પોલીસે આરોપીઓની રિમાન્ડની કાર્યવાહી શરૂ કરી

જીઆરડી કર્મચારીએ ઈજાગ્રસ્ત વ્યક્તિ અંગે પોલીસને જાણ કરી હતી. રમેશને પેથાપુર પ્રાથમિક આરોગ્ય કેન્દ્રમાં ખસેડવામાં આવ્યો હતો. જોકે, સારવાર દરમિયાન તેમનું મોત થયું હતું. ઝાલોદ પોલીસે 24 કલાકમાં ત્રણેય આરોપીઓ પ્રવીણ, વિપુલ અને સુનીતાબેનની ધરપકડ કરી લીધી છે. પોલીસે આરોપીઓની રિમાન્ડની કાર્યવાહી શરૂ કરી છે.