રાજકોટ, લોધિકા અને પડધરી તાલુકાના ૧૮૦ ગામોનું વિશાળ કાર્યક્ષેત્ર ધરાવતું રાજકોટનું બેડી માર્કેટ યાર્ડ આજે સવા લાખ મણ ઘઉંની આવકથી છલકાઇ ઉઠ્યું હતું.

વિશેષમાં રાજકોટ માર્કેટ યાર્ડના વેપારી વર્તુળોએ જણાવ્યું હતું કે, હિસાબી કામકાજ સબબ માર્ચ એન્ડિંગની છ દિવસની રજા બાદ ગત સાંજથી તમામ જણસીઓની આવકો શરૂ કરાઇ હતી જે આજે સવારે સુધી ચાલુ રહી હતી અને ખેડૂતોના વિવિધ જણસીઓ ભરેલા કુલ ૨૦૦૦થી વધુ વાહનોને યાર્ડમાં પ્રવેશ અપાયો હતો જેમાં સૌથી વધુ સવા લાખ મણ ઘઉંની આવક થઇ હતી, જ્યારે આવક વધવા છતાં ભાવ જળવાયેલા રહ્યા હતા. ઘઉં ઉપરાંત રાય, રાયડો, મેથી, ધાણા, જીરૂં, મગફળી સહિતની જણસીઓની પણ સારી માત્રામાં આવક થઇ હતી. રાયડા અને સોયાબિનના ભાવમાં ખુલતી બજારે વધારો નોંધાયો હતો.

અત્રે ઉલ્લેખનીય છે કે રાજકોટ સહિત સમગ્ર સૌરાષ્ટ્રના માર્કેટ યાર્ડ એક સપ્તાહની રજા બાદ આજથી ધમધમ્યા છે અને રવિ પાકની તમામ જણસીઓની મબલખ આવક થઇ છે.