ગુજરાતમાં સ્થાનિક સ્વરાજ્યની ચૂંટણીનો જંગ જામ્યો છે, ત્યારે રાજકોટ જિલ્લામાં સુરક્ષા વ્યવસ્થાને આખરી ઓપ આપી દેવામાં આવ્યો છે. જિલ્લા પોલીસ વડા (SP) વિજયસિંહ ગુર્જરે પત્રકાર પરિષદમાં જણાવ્યું હતું કે, સમગ્ર જિલ્લામાં કાયદો અને વ્યવસ્થા જાળવવા માટે પોલીસે ચુસ્ત બંદોબસ્ત ગોઠવ્યો છે. કુલ 647 બિલ્ડિંગોમાં મતદાન યોજાનાર છે, જેનું પોલીસે ગંભીરતાથી વર્ગીકરણ કર્યું છે.

મતદાન મથકોનું વર્ગીકરણ અને સુરક્ષા

જિલ્લાના મતદાન મથકોને તેમની સંવેદનશીલતાના આધારે ત્રણ ભાગમાં વહેંચવામાં આવ્યા છે

સામાન્ય: 407 મથકો

સંવેદનશીલ: 159 મથકો

અતિ સંવેદનશીલ: 81 મથકો

સંવેદનશીલ અને અતિ સંવેદનશીલ મથકો પર વધારાનો પોલીસ કાફલો તૈનાત રહેશે જેથી કોઈપણ પ્રકારની અનિચ્છનીય ઘટનાને ટાળી શકાય.

ભારે પોલીસ બંદોબસ્તની વિગત

ચૂંટણી પ્રક્રિયા દરમિયાન કુલ 2816 પોલીસ અધિકારીઓ અને કર્મચારીઓ મેદાનમાં ઉતરશે. આ કાફલામાં 1 એસપી (SP), 2 એએસપી (ASP) અને 4 ડીવાયએસપી (DySP), 29 પીઆઈ (PI) અને 57 પીએસઆઈ (PSI), 940 એએસઆઈ, હેડ કોન્સ્ટેબલ અને કોન્સ્ટેબલ, 1291 હોમગાર્ડ, જી.આર.ડી. અને 56 એસઆરપી (SRP) જવાનોનો સમાવેશ થાય છે. આ ઉપરાંત, કોઈપણ ઈમરજન્સી સ્થિતિને પહોંચી વળવા માટે 12 સ્પેશિયલ સ્ટ્રાઈકિંગ ટીમો સતત પેટ્રોલિંગમાં રહેશે.

ટેકનોલોજીનો પ્રયોગ

આ વખતે પોલીસ પરંપરાગત સુરક્ષાની સાથે આધુનિક ટેકનોલોજીનો પણ ઉપયોગ કરી રહી છે. અતિ સંવેદનશીલ વિસ્તારો પર નજર રાખવા માટે 6 હાઈ-ટેક ડ્રોનનો ઉપયોગ કરવામાં આવશે. એટલું જ નહીં, મેદાન પર હાજર પોલીસ જવાનો દ્વારા અંદાજે 100 બોડીકેમ દ્વારા સમગ્ર પ્રક્રિયાનું લાઈવ મોનિટરિંગ કરવામાં આવશે, જેથી દરેક હિલચાલ પર હેડક્વાર્ટરથી નજર રાખી શકાય.

અટકાયતી પગલાં અને કડક કાર્યવાહી

ચૂંટણી પહેલાં અસામાજિક તત્વો પર લગામ કસવા માટે પોલીસે ઓપરેશન તેજ કર્યું છે. અત્યાર સુધીમાં:

8596 લોકો સામે અટકાયતી પગલાં લેવાયા છે.

10 માથાભારે તત્વો સામે પાસા (PASA) હેઠળ કાર્યવાહી થઈ છે.

21 શખ્સોને જિલ્લામાંથી તડીપાર કરવામાં આવ્યા છે.

અમે જિલ્લામાં શાંતિપૂર્ણ મતદાન માટે સંપૂર્ણ રીતે તૈયાર છીએ. સંવેદનશીલ મથકો પર અમારું ખાસ ધ્યાન છે અને ટેકનોલોજીના માધ્યમથી અમે દરેક ગતિવિધિ પર નજર રાખી રહ્યા છીએ. નાગરિકો નિર્ભય થઈને મતદાન કરી શકે તે માટે પોલીસ કટિબદ્ધ છે.- વિજયસિંહ ગુર્જર, એસપી, રાજકોટ ગ્રામ્ય