રાજકોટના જશમતભાઈ ભીમાણીનો શોખ શાનદાર છે. જશમતભાઈ વ્યવસાયે બેંકમાં મેનેજર છે અને B.com LLBનો અભ્યાસ કરેલો છે. બેંકમાં સારી પોસ્ટ પર નોકરીની સાથે જશમતભાઈ ઘૂટો બનાવે છે. ઘૂટો બનાવવો એ તેમનો શોખ છે અને તેઓ ૪૫ વર્ષથી ઘૂટો બનાવે છે. જોકે રાજકોટમાં છેલ્લા ૪-૫ વર્ષથી ઘૂટો બનાવી રાજકોટવાસીઓને પીરસે છે. ૩૪ શાકભાજી, ૩ ફળ અને ૩ કઠોળના મિશ્રણનો જશમતભાઈના હાથનો ઘૂટો કોઈ પણ વ્યક્તિ ચાખે એટલે એક વાર તો ચોક્કસથી કહી દે, "વાહ..!" 

આજકાલ સાથેની વાતચીતમાં જશમતભાઈએ જણાવ્યું હતું કે, ઘૂટો એ સૌથી વધુ શિયાળામાં ખવાતી વાનગી છે. ૩૪ શાકભાજી, ૩ ફળ અને ૩ કઠોળનો બનેલો આ ઘૂટો આરોગ્ય માટે પણ ફાયદાકારક છે. સાંજે નોકરીમાંથી છૂટયા બાદ તરત જ તેઓ ઘૂટો બનાવવા સાધુવાસવાણી રોડ પર આવેલી તેની દુકાને પહોંચી જાય છે. તે અને તેની પત્ની સાથે મળી ઘૂટો બનાવે છે. અંદાજે દોઢથી બે કલાકમાં આ ઘૂટો બને છે. અને બાજરાના રોટલા સાથે આ ઘૂટાને ખાવામાં આવે છે. ઘૂટો બનાવી તેઓ નફો પણ સારો એવો કરી લે છે. ગત શિયાળે જ ફકત ચાર મહિનામાં ઘૂટો બનાવી તેમણે ૧૨ લાખની કમાણી કરી હતી. જશમતભાઈનો ઘૂટો દેશ-વિદેશ સુધી પ્રખ્યાત છે. વિદેશથી પણ જશમતભાઈને ઘૂટો બનાવવાની રીત પૂછવા ફોન આવે છે. જશમતભાઈ અને તેમની પત્નીનું સ્વપ્ન છે કે તેઓનો આ પ્રખ્યાત ઘૂટો વિદેશ સુધી પહોંચે અને તે માટે તેઓ તે પ્રકારનું આયોજન પણ કરી રહ્યા છે.