દેશમાં કર્મચારી ભવિષ્ય નિધિ સંગઠન (ઈપીએફઓ) ખૂબ જ ટૂંક સમયમાં તેનું નવું પ્લેટફોર્મ ઈપીએફઓ ​​3.0 લોન્ચ કરવા જઈ રહ્યું છે. ઈપીએફઓ ​​3.0 પાસે એક મજબૂત આઈટી પ્લેટફોર્મ હશે, જેનો ઉદ્દેશ્ય સભ્યોને બેંક જેવી સેવાઓ સુલભ બનાવવાનો છે. કેન્દ્રીય શ્રમ અને રોજગાર મંત્રી મનસુખ માંડવિયાએ ગયા મહિને કહ્યું હતું કે આ નવી સિસ્ટમ મે અને જૂન 2025 વચ્ચે કાર્યરત થશે.મંત્રીએ કહ્યું છે કે ઈપીએફઓ ​​3.0 એક વિશ્વસનીય પ્લેટફોર્મ હશે, જે 9 કરોડથી વધુ ગ્રાહકોને કોઈપણ મુશ્કેલી વિના ઘણી નવી સુવિધાઓ આપશે. જેમ કે તમારા દાવાનું ઓટોમેશન સેટલમેન્ટ, ડિજિટલી ભૂલો સુધારવી અને સૌથી અગત્યનું હશે એટીએમમાંથી સીધા ભંડોળ ઉપાડવાની સુવિધા. સૌથી મોટો ફાયદો એ થશે કે હવે સભ્યો બેંક ખાતાની જેમ એટીએમ માંથી પીએફના પૈસા ઉપાડી શકશે.

ઈપીએફઓ ​​​3.0 માં આ ફેરફારો અમલી બનશે

1. પીએફ ઉપાડ પ્રક્રિયા ઘણી સરળ અને ઝડપી બનશે: હવે દાવાઓનું સમાધાન આપમેળે થશે, મેન્યુઅલ કાર્યની જરૂર રહેશે નહીં.

2. દાવો મંજૂર થતાંની સાથે જ, બેંક ખાતાની જેમ એટીએમમાંથી તમારા પૈસા ઉપાડી શકશો.

3. તમે ઘરે બેઠા તમારી ખાતાની માહિતી ઓનલાઈન સુધારી શકો છો, જેનાથી ફોર્મ ભરવાની ઝંઝટ દૂર થશે.

4. ઈપીએફઓ ​​હવે અટલ પેન્શન યોજના અને પ્રધાનમંત્રી જીવન વીમા યોજના જેવી અન્ય સામાજિક સુરક્ષા યોજનાઓને તેની સિસ્ટમમાં સામેલ કરવાનું વિચારી રહ્યું છે, જેથી અસંગઠિત અને અનૌપચારિક ક્ષેત્રના કામદારોને પણ પેન્શન અને સુરક્ષાના વધુ સારા લાભ મળી શકે.

5. લાંબા ફોર્મને બદલે, હવે ઓટીપી દ્વારા ઝડપી અને સુરક્ષિત ફેરફારો કરી શકાશે

ઈએસઆઈસી આરોગ્ય સેવાઓ પણ અપગ્રેડ થશે

કર્મચારી રાજ્ય વીમા નિગમ (ઈએસઆઈસી) પણ તેની સેવાઓને અપગ્રેડ કરી રહ્યું છે. ટૂંક સમયમાં, ઈએસઆઈસી લાભાર્થીઓ આયુષ્માન ભારત યોજના હેઠળ સરકારી, ખાનગી અને સખાવતી હોસ્પિટલોમાં મફત સારવારનો લાભ મેળવી શકશે. હાલમાં, ઈએસઆઈસી 165 હોસ્પિટલો દ્વારા 18 કરોડ લોકોને તબીબી સુવિધાઓ પૂરી પાડી રહ્યું છે.