ભારતના ખાનગી ક્ષેત્રે શાનદાર પ્રદર્શન કર્યું છે અને ફેબ્રુઆરીમાં 6 મહિનાની ઊંચી સપાટીએ પહોંચ્યું છે. એચએસબીસીના ફ્લેશ ઈન્ડિયા કમ્પોઝિટ પરચેઝિંગ મેનેજર્સ ઇન્ડેક્સ (પીએમઆઈ) અનુસાર, સેવા ક્ષેત્રમાં તેજીના કારણે આ વૃદ્ધિ જોવા મળી છે.

ફેબ્રુઆરીમાં સંયુક્ત પીએમઆઈ ઉત્પાદન વધીને 60.6 થયું જે જાન્યુઆરીમાં 57.7 હતું. એસ એન્ડ પી ગ્લોબલના એક સર્વેમાં જાણવા મળ્યું છે કે રોજગારના મોરચે પણ રેકોર્ડ વધારો થયો છે, જે દેશના અર્થતંત્ર માટે સારો સંકેત છે. જોકે, આ સમયગાળા દરમિયાન, ઉત્પાદન ક્ષેત્રના પીએમઆઈમાં થોડો ઘટાડો થયો હતો, જે જાન્યુઆરીમાં 57.7 ટકાની સરખામણીમાં હવે 57.1 ટકા થઈ ગયો છે. દરમિયાન, સેવા કંપનીઓએ ઝડપી ગતિએ કામદારોની ભરતી કરી હોવાથી રોજગારીમાં પણ વધારો થયો છે. કામદારોને પૂર્ણ-સમય અને અંશ-સમય ધોરણે રાખવામાં આવ્યા હતા.

રિપોર્ટ અનુસાર, ઉત્પાદન ઉદ્યોગમાં સ્થાનિક અને વિદેશી ગ્રાહકોની વધતી માંગને કારણે નવા ઓર્ડરની સંખ્યામાં વધારો થયો છે. ખાનગી ક્ષેત્રમાં વેચાણ વધ્યું છે અને સેવા કંપનીઓમાં વ્યવસાયિક પ્રવૃત્તિ પણ ત્રણ મહિનાની ટોચે પહોંચી ગઈ છે. સંયુક્ત સ્તરે નવા નિકાસ ઓર્ડરમાં પણ વધારો થયો છે.

એચએસબીસીના ચીફ ઈન્ડિયા ઈકોનોમિસ્ટ પ્રાંજુલ ભંડારીએ જણાવ્યું હતું કે વિશ્વભરમાં ઝડપી સ્ટોક રિપ્લેમેન્ટને કારણે નવા નિકાસ ઓર્ડરમાં વધારો થયો છે. આ સાથે, ઉત્પાદનમાં વધારાને કારણે, કંપનીઓ ભવિષ્ય વિશે આશાવાદી છે. ઇનપુટ કિંમતોમાં ઘટાડો અને ઉત્પાદનમાં વધારાને કારણે, માર્જિન સ્તરમાં પણ સુધારો થયો છે, ખાસ કરીને માલ ઉત્પાદકો માટે.