પ્રધાનમંત્રી નરેન્દ્ર મોદી આજે રાત્રે 8 વાગ્યે રાષ્ટ્રને સંબોધિત કરશે. એવું કહેવામાં આવી રહ્યું છે કે પીએમ ઓપરેશન સિંદૂર અંગે સંબોધન કરી શકે છે. 

યુદ્ધવિરામ બાદ વડાપ્રધાન નરેન્દ્ર મોદી આજે રાત્રે 8 વાગ્યે રાષ્ટ્રને સંબોધિત કરશે. શનિવારે ભારત અને પાકિસ્તાન વચ્ચે યુદ્ધવિરામ થયો હતો. આ પછી, ત્રણેય સેનાના DGMO છેલ્લા ત્રણ દિવસથી પ્રેસ કોન્ફરન્સ કરી રહ્યા હતા.

વડાપ્રધાન ઓપરેશન સિંદૂર અને ત્યારબાદની પરિસ્થિતિ વિશે માહિતી આપી શકે છે.

આ પહેલા પાકિસ્તાનના વડાપ્રધાન શાહબાઝ શરીફે 10 મેના રોજ રાત્રે 11.30 વાગ્યે પાકિસ્તાનના લોકોને સંબોધિત કર્યા હતા. આમાં તેમણે ભારત વિરુદ્ધ પાકિસ્તાની સેનાના ઓપરેશન 'બન્યાન-ઉન-મર્સૂસ'ની સફળતાનો દાવો કર્યો હતો. ત્યારથી પાકિસ્તાનમાં 'યૌમ-એ-તશક્કુર' ઉજવવામાં આવે છે. યૌમ-એ-તશક્કુર એક ઉર્દૂ શબ્દ છે, જેનો અર્થ થાય છે આભાર માનવાનો દિવસ.

હવે ભારત અને પાકિસ્તાનના ડીજીએમઓ સાંજે 5 વાગ્યે હોટલાઇન પર વાત કરશે. ઓપરેશન સિંદૂર અંગે ડીજીએમઓએ કહ્યું કે અમે ફક્ત આતંકવાદીઓના માળખાને નિશાન બનાવ્યું હતું, જ્યારે પાકિસ્તાની સેનાએ આતંકવાદીઓને ટેકો આપ્યો હતો.

મુખ્યમંત્રી ઓમર અબ્દુલ્લાએ ગોળીબારના પીડિતોને મળ્યા

સરહદ પારથી થયેલા ગોળીબારના ભોગ બનેલા લોકોના ઘરોની મુલાકાત લીધા પછી, જમ્મુ અને કાશ્મીરના મુખ્યમંત્રી ઓમર અબ્દુલ્લાએ કહ્યું, "હું અહીં ફક્ત મારી શ્રદ્ધાંજલિ આપવા અને વહીવટને ટેકો આપવા આવ્યો છું. કોઈએ કોઈ માંગણી કરી નથી. આ તેમના પરિવારો માટે દુઃખદ સમય છે."​​​​​​​

10 મેના રોજ યુદ્ધવિરામ થયો, પાકિસ્તાને 3 કલાકમાં ભંગ કર્યો

ભારત અને પાકિસ્તાન વચ્ચે શનિવારે સાંજે 5 વાગ્યે યુદ્ધવિરામ લાગુ થયો. જોકે, પાકિસ્તાને તેને લાગુ કર્યાના માત્ર 3 કલાક પછી જ તોડી નાખ્યું. પાકિસ્તાન દ્વારા જમ્મુ અને કાશ્મીર, રાજસ્થાન અને પંજાબમાં 15 સ્થળોએ ડ્રોન હુમલા કરવામાં આવ્યા હતા, જેને ભારતીય વાયુસેનાએ નિષ્ફળ બનાવ્યા હતા.

ટ્રમ્પે કહ્યું હતું - યુદ્ધવિરામ માટે મધ્યસ્થી કરી હતી અમેરિકન રાષ્ટ્રપતિ ડોનાલ્ડ ટ્રમ્પે શનિવારે સાંજે દાવો કર્યો હતો કે અમેરિકાની મધ્યસ્થી બાદ બંને દેશો યુદ્ધવિરામ માટે સંમત થયા છે. આ પછી, ભારત અને પાકિસ્તાને પણ યુદ્ધવિરામની પુષ્ટિ કરી.