પશ્ચિમ એશિયામાં સર્જાયેલી યુદ્ધ જેવી સ્થિતિને કારણે આંતરરાષ્ટ્રીય સ્તરે કાચા તેલ (ક્રૂડ ઓઈલ) ના ભાવ પ્રતિ બેરલ 120 ડોલરને પાર કરી ગયા છે. આ વધારાનો બોજ ઘટાડવા માટે સરકાર હવે ઈંધણના ભાવ વધારવા પર ગંભીરતાથી વિચાર કરી રહી છે.

કેટલો વધી શકે છે ભાવ?
સૂત્રો દ્વારા મળતી માહિતી મુજબ આગામી દિવસોમાં ભાવમાં નીચે મુજબનો વધારો થઈ શકે છે:

પેટ્રોલ અને ડીઝલ: પ્રતિ લીટર ₹4 થી ₹5 સુધીનો વધારો તોળાઈ રહ્યો છે.

રાંધણ ગેસ (LPG): ઘરગથ્થુ ગેસ સિલિન્ડરના ભાવમાં ₹40 થી ₹50 સુધીનો વધારો થઈ શકે છે.

નોંધનીય છે કે, આજે એટલે કે 1 મેથી કોમર્શિયલ ગેસ સિલિન્ડરના ભાવમાં પહેલેથી જ ₹993નો તોતિંગ વધારો ઝીંકી દેવામાં આવ્યો છે.

શા માટે લેવામાં આવી રહ્યો છે આ નિર્ણય?
સરકારના ઉચ્ચ અધિકારીઓના જણાવ્યા અનુસાર કાચા તેલની આસમાની કિંમતોને કારણે તેલ કંપનીઓ પર આર્થિક બોજ વધી રહ્યો છે. તેલ કંપનીઓના નુકસાનને મર્યાદિત કરવા અને રાજકોષીય બોજ ઘટાડવા માટે ભાવવધારો કરવો અનિવાર્ય જણાઈ રહ્યો છે.

4 વર્ષ બાદ પ્રથમ વખત વધશે ભાવ
જો સરકાર આ પ્રસ્તાવને મંજૂરી આપશે, તો તે છેલ્લા 4 વર્ષમાં પેટ્રોલ અને ડીઝલની કિંમતોમાં પ્રથમ વધારો હશે. વર્ષ 2022 થી અત્યાર સુધી પેટ્રોલ અને ડીઝલના ભાવમાં કોઈ મોટો ફેરફાર કરવામાં આવ્યો નથી.

ક્યારે આવશે અંતિમ નિર્ણય?
સરકાર હાલમાં પશ્ચિમ એશિયાની ભૌગોલિક અને રાજકીય સ્થિતિ પર ચાંપતી નજર રાખી રહી છે. અધિકારીઓના જણાવ્યા મુજબ આગામી 5 થી 7 દિવસની અંદર ભાવવધારા અંગે આખરી નિર્ણય લેવામાં આવી શકે છે. સરકાર મોંઘવારીની અસર ઘટાડવા માટે વિવિધ વિકલ્પો પર આંતરિક ચર્ચા કરી રહી છે જેથી સામાન્ય જનતા પર ઓછામાં ઓછો બોજ પડે.

​​​​​​​ઈરાન અને અમેરિકા વચ્ચેના સંઘર્ષને કારણે વૈશ્વિક સપ્લાય ચેઈન ખોરવાઈ છે, જેની સીધી અસર ભારતના ઉર્જા ક્ષેત્ર પર દેખાઈ રહી છે. હવે જોવાનું એ રહેશે કે સરકાર જનતાને આ મોંઘવારીમાંથી બચાવવા માટે કોઈ રાહત આપે છે કે પછી ભાવવધારો ઝીંકાય છે.