અગાઉ પ્રસાદીમાં વપરાતા લોટ-ઘી વગેરેના સેમ્પલ લેવાયા હતા: કેન્દ્ર સરકારના ફૂડ સેફ્ટી ડિપાર્ટમેન્ટ દ્વારા અપાયું રેટીંગ‎

યાત્રાધામ દ્વારકાના વિશ્વ વિખ્યાત ભગવાન દ્વારકાધીશજી મંદિરમાં બનતા પ્રસાદની ગુણવત્તાને કેન્દ્ર સરકારના ફુડ સેફટી ડીપાર્ટમેન્ટ દ્વારા વેરી ગુડ રેટીંગ અપાયુ છે.

થોડા મહિના અગાઉ પ્રસિદ્ધ યાત્રાધામ તિરૂપતિ બાલાજી મંદિરની પ્રસાદની ગુણવત્તા વિવાદ બાદ દ્વારકાધીશ જગતમંદિરમાં પણ ભાવિકોમાં વિતરણ કરાતા પ્રસાદની ગુણવત્તા અંગે મંદિર દેવસ્થાન સમિતિ દ્વારા જામનગર ફુડ એન્ડ ડ્રગ એડમીનીસ્ટ્રેશન ટીમ દ્વારા જગતમંદિરમાં બનતા પ્રસાદની ચકાસણી હેતુ પ્રસાદીમાં વપરાતો લોટ, ઘી, મેંદો સહિતની વસ્તુઓના સેમ્પલ લેવાયા હતા. જે તમામની ઉચ્ચ સ્તરે ચકાસણી કરાયા બાદ કેન્દ્ર સરકારની ફુડ સેફટી એન્ડ સ્ટાન્ડર્ડ ઓથોરીટી ઓફ ઈન્ડીયા દ્વારા પ્રસાદની ગુણવત્તા અંગે 'વેરી ગુડ’ રેટીંગ આપવામાં આવેલ છે.

પ્રસાદની ગુણવત્તાની સતત જાળવણી કરાશે: કલેકટર

આ અંગે દેવસ્થાન સમિતિના અધ્યક્ષ અને જિલ્લા કલેકટર જી.ટી.પંડયાએ જણાવેલ કે તેમના અત્યાર સુધીમાં થયેલા અનુભવમાં જગતમંદિરમાં વપરાતી ચીજવસ્તુઓ ગુણવત્તાસભર જણાઈ છે અને વેરી ગુડ રેટીંગ મળ્યુ હોય,આ પ્રસાદની ગુણવત્તાની સતત જાળવણી કરવામાં આવશે ઉપરાંત યાત્રાળુઓને શુદ્ધ પ્રસાદીનું જ વિતરણ કરવામાં આવશે.