ભારતીય ટપાલ વિભાગની 'સીનિયર સિટીઝન સેવિંગ સ્કીમ' (SCSS) નિવૃત્ત વ્યક્તિઓ માટે નિયમિત આવકનું એક સબળ માધ્યમ બની છે. આ યોજનામાં હાલમાં 8.2% ના દરે વાર્ષિક વ્યાજ આપવામાં આવે છે, જે સુરક્ષિત રોકાણની સાથે આકર્ષક વળતર પણ પૂરું પાડે છે.

યોજનાની મુખ્ય વિશેષતાઓ અને સુરક્ષા
આ યોજના સંપૂર્ણપણે ભારત સરકાર દ્વારા સંચાલિત છે, તેથી તેમાં રોકાયેલા નાણાં 100% સુરક્ષિત રહે છે. હાલમાં 8.2% વ્યાજ મળે છે, જે મોટાભાગની બેંકોની ફિક્સ્ડ ડિપોઝિટ કરતા વધારે છે. આ યોજનામાં ન્યૂનતમ ₹1,000 થી ખાતું ખોલાવી શકાય છે અને મહત્તમ ₹30 લાખ સુધીનું રોકાણ કરી શકાય છે. ઇન્કમ ટેક્સ એક્ટની કલમ 80C હેઠળ રોકાણકાર ₹1.5 લાખ સુધીની ટેક્સમાં છૂટ મેળવી શકે છે.

કોણ કરી શકે છે રોકાણ?
આ યોજના ખાસ કરીને વરિષ્ઠ નાગરિકો માટે તૈયાર કરવામાં આવી છે. 60 વર્ષ કે તેથી વધુ ઉંમરની કોઈપણ વ્યક્તિ આ ખાતું ખોલાવી શકે છે.

VRS લેનારા: 55 વર્ષથી વધુ ઉંમરના લોકો જેમણે સ્વૈચ્છિક નિવૃત્તિ લીધી હોય તેઓ પણ રોકાણ કરી શકે છે.

સંરક્ષણ કર્મીઓ: 50 વર્ષથી વધુ ઉંમરના નિવૃત્ત સંરક્ષણ કર્મચારીઓ માટે પણ આમાં છૂટછાટ આપવામાં આવી છે.

પતિ-પત્ની સાથે મળીને જોઈન્ટ એકાઉન્ટ પણ ખોલાવી શકે છે.

સમયગાળો અને વ્યાજની ચુકવણી
SCSS યોજનાનો મેચ્યોરિટી પિરિયડ 5 વર્ષનો હોય છે, જેને જરૂર જણાય તો વધુ 3 વર્ષ માટે લંબાવી શકાય છે. આ યોજનાની સૌથી મોટી ખાસિયત એ છે કે તેમાં વ્યાજની ગણતરી દર ત્રણ મહિને (ક્વાર્ટરલી) કરવામાં આવે છે અને તે રોકાણકારના ખાતામાં જમા થાય છે, જેનાથી નિવૃત્તિ પછી નિયમિત આવક જળવાઈ રહે છે.

દર મહિને ₹17,000 કેવી રીતે મળશે?
જો કોઈ રોકાણકાર આ યોજનામાં અંદાજે ₹25 લાખનું રોકાણ કરે છે, તો 8.2% વ્યાજ દર મુજબ તેને દર ત્રણ મહિને આશરે ₹51,250 વ્યાજ પેટે મળશે. જો આ રકમને મહિના મુજબ વહેંચવામાં આવે, તો રોકાણકારને સરેરાશ દર મહિને ₹17,000 થી વધુની નિયમિત આવક પ્રાપ્ત થઈ શકે છે.

અકાળે નાણાં ઉપાડવા પર પેનલ્ટી
જો રોકાણકાર 5 વર્ષનો સમયગાળો પૂર્ણ થાય તે પહેલા નાણાં ઉપાડે છે, તો નિયમ મુજબ પેનલ્ટી (દંડ) ભરવો પડે છે. જોકે, ખાતાધારકના અવસાનના કિસ્સામાં સંપૂર્ણ રકમ નોમિનીને સોંપી દેવામાં આવે છે. આમ જેઓ જોખમ વગર અને સરકારી ગેરંટી સાથે માસિક આવક ઈચ્છે છે, તેમના માટે પોસ્ટ ઓફિસની આ સ્કીમ એક ઉત્તમ આર્થિક સહારો છે.