સુરક્ષિત રોકાણ માટે પોસ્ટ ઓફિસની બચત યોજનાઓ હંમેશા રોકાણકારોની પ્રથમ પસંદગી રહી છે. હાલમાં પોસ્ટ ઓફિસ તેની યોજનાઓ પર આકર્ષક વ્યાજ દરો ઓફર કરી રહી છે, જે દેશની ઘણી મોટી બેંકોના ફિક્સ ડિપોઝિટ (FD) ના વ્યાજ કરતા પણ વધારે છે. આમાંની સૌથી લોકપ્રિય યોજના એટલે 'પોસ્ટ ઓફિસ ટાઈમ ડિપોઝિટ' (TD).

શું છે પોસ્ટ ઓફિસ ટાઈમ ડિપોઝિટ (TD)?
આ યોજના બેંકની FD ની જેમ જ કામ કરે છે. તેમાં તમે નક્કી કરેલા સમય માટે રકમ જમા કરાવો છો અને મેચ્યોરિટી પર તમને મુદ્દલની સાથે વ્યાજની રકમ પરત મળે છે. આ સ્કીમ પર સીધું કેન્દ્ર સરકારનું નિયંત્રણ હોવાથી તેમાં રોકાણકારોના નાણાં સંપૂર્ણપણે સુરક્ષિત રહે છે.

વિવિધ સમયગાળા માટે વ્યાજ દર
પોસ્ટ ઓફિસમાં તમે 1 વર્ષથી લઈને 5 વર્ષ સુધીના સમયગાળા માટે ખાતું ખોલાવી શકો છો. હાલના વ્યાજ દરો નીચે મુજબ છે:

1 વર્ષની TD: 6.9% વ્યાજ

2 વર્ષની TD: 7.0% વ્યાજ

3 વર્ષની TD: 7.1% વ્યાજ

5 વર્ષની TD: 7.5% વ્યાજ

₹1 લાખનું રોકાણ કેવી રીતે બનશે ₹1.45 લાખ?
જો કોઈ રોકાણકાર 5 વર્ષના સમયગાળા માટે ₹1,00,000 આ સ્કીમમાં જમા કરે છે, તો તેને 7.5% ના વાર્ષિક વ્યાજ મુજબ પાંચ વર્ષ પછી કુલ ₹1,44,995 પરત મળશે. એટલે કે, પાંચ વર્ષમાં માત્ર વ્યાજ તરીકે જ તમને ₹44,995 ની કમાણી થશે. હાલમાં ઘણી પ્રાઈવેટ કે સરકારી બેંકો 5 વર્ષની એફડી પર આટલું ઊંચું વ્યાજ આપી રહી નથી.

ધ્યાનમાં રાખવા જેવી બાબતો
બેંકોમાં વરિષ્ઠ નાગરિકોને (Senior Citizens) સામાન્ય ગ્રાહકો કરતા 0.50% વધુ વ્યાજ મળતું હોય છે, પરંતુ પોસ્ટ ઓફિસની આ સ્કીમમાં તમામ રોકાણકારો માટે વ્યાજ દર સમાન રહે છે. જોકે, સરકારી ગેરંટી અને ઊંચું વ્યાજ આ સ્કીમને મધ્યમ વર્ગના રોકાણકારો માટે ખૂબ જ આકર્ષક બનાવે છે. આ ઉપરાંત 5 વર્ષની સ્કીમમાં આવકવેરાની કલમ 80C હેઠળ ટેક્સમાં પણ રાહત મળી શકે છે.