ગોંડલના અમિત ખુંટની આત્મહત્યાના ચકચારી પ્રકરણમાં જેલ હવાલે રહેલા મુખ્ય મહિલા આરોપીએ પોતાને 22 જેટલા પોલીસ અધિકારીઓએ બે દિવસ સુધી ગેરકાયદે બંધક બનાવી હોવાની તેના વકીલ મારફત ગોંડલ કોર્ટમાં ફરીયાદ નોંધાવતા ભારે ચર્ચા જાગી છે.

બે દિવસ સુધી અલગ અલગ જગ્યાએ બંધક રાખી 

આ ચકચારી પ્રકરણમાં અમિત ખુંટને હની ટ્રેપમાં ફસાવવાના આરોપસર જેની ધરપકડ થઈ છે તે પૂજાબેન રાજગોરના વકીલ એડવોકેટ ભૂમિકા પી. પટેલ વગેરે મારફત ગોંડલ કોર્ટમાં કરેલી ફરિયાદમાં પૂજાબેન રાજગોરને અલગ અલગ 22 જેટલા પોલીસ અધિકારીઓએ બે દિવસ સુધી અલગ અલગ જગ્યાએ બંધક રાખી હોવાનું જણાવ્યું છે. જેમાં હાલના ફરિયાદી વતી વકીલોએ જુદા જુદા પોલીસ સ્ટેશનના સીસીટીવી ફૂટેજ સહિતના પુરાવાઓ મેળવવા કોર્ટમાં રજૂઆત કરવાની તજવીજ હાથ ધરી હતી. આ પ્રકરણમાં હાલના ફરિયાદી પૂજાબેન રાજગોર વતી એડવોકેટ ભૂમિકા પી પટેલ, વિજેન્દ્ર પી. પટેલ, શિવરાજસિંહ બી. ઝાલા, અવની બોરીસાગર વગેરે રોકાયા છે.