કમોસમી વરસાદની આગાહીના પગલે ત્રણ દિવસ બાદ આજે  શનીવારે સવારે પીથલપુર સહિતના પંથકમાં ધોધમાર વરસાદ ખાબકતા  ઠેરઠેર પાણી ભરાયા હતા.જિલ્લામાં બપોર સુધી અન્યત્ર મેઘવિરામ રહયો હતો.શહેરનું મહત્તમ તાપમાન વધીને ૩૪.૪ ડિગ્રી નોંધાયુ હતુ.
પીથલપુર એસ.ટી બસ સ્ટેન્ડ સહિત રસ્તાઓમાં ગોઠણ સમા પાણી ભરાતા રાહદારીઓ, યાત્રાળુઓ અટવાયા હતા. ભર ઉનાળે વૈશાખે અષાઢી માહોલ જામતા ખેતરમાં પાકને ભારે નુકસાન થયાનુ ધરતીપુત્રોએ જણાવ્યું છે. કમોસમી વરસાદથી ગરમીમાં ઠંડક પ્રસરી હતી. ખેડૂતો અને વેપારીઓમાં તેમજ અનેક  જગ્યાએ લગ્ન સહિતના પ્રસંગોમાં પણ દોડધામ મચી હતી.
દક્ષિણ- પશ્ચિમ રાજસ્થાનમાં ઊભા થયેલા ડિસ્ટર્બન્સના કારણે હવામાન વિભાગ દ્વારા ગુજરાતમાં ભાવનગર સહિત અનેક સ્થળોએ તા.૪થી ૧૨ મે સુધી  ૩૦થી ૪૦ કિ.મી.ની ઝડપે પવનની સાથે માવઠાની આગાહી કરવામાં આવી છે.આજે ઓરેન્જ એલર્ટ વચ્ચે ભાવનગર જિલ્લાના તમામ તાલુકાઓમાં બપોર સુધી મેઘવિરામ રહયો હતો.હજુ તા.૧૧ અને ૧૨ મે ના રોજ હવામાન વિભાગ દ્વારા હળવાથી મધ્યમ વરસાદની આગાહી કરવામાં આવી છે. ભાવનગર શહેરનું  મહત્તમ તાપમાન એક ડિગ્રી વધીને ૩૪.૪  ડિગ્રી નોંધાયુ હતુ.આથી બપોરના સમયે ગરમી અનુભવાઈ હતી.જ્યારે લઘુતમ તાપમાન ૧.૮ ડિગ્રી ઘટીને ૨૩.૮ ડિગ્રી નોંધાયુ હતુ.આજે શનિવારે સવારે ભેજ  ૮૨ ટકા નોંધાયો હતો.જ્યારે પવનની ઝડપ આજે સવારે ૧૨ કિ.મી. રહી હતી.