જેતપુરમાં જુનાગઢ રોડ પર આવેલી દુકાનમાંથી પોલીસે રૂપિયા ૩૯૦૦ ની કિંમતનો ૩૯૦ ગ્રામ ગાંજાનો જથ્થો ઝડપી લીધો હતો. ગાંજાના જથ્થા સાથે દુકાનદાર અને તેને ગાંજો આપનાર બંને શખસોને પણ પકડી પાડ્યા હતા.
​​​​​​​
જાણવા મળતી વિગતો મુજબ, જેતપુર પીઆઇ એ.ડી.પરમારની રાહબરી હેઠળ પીએસઆઇ વી.સી.પરમાર તથા તેમની ટીમ પેટ્રોલિંગમાં હતી. દરમિયાન એવી બાતમી મળી હતી કે, મહિપત ધીરૂભાઈ ખુમાણ( રહે.જેતપુર) એ જુનાગઢ રોડ હિંમતભાઈ પતંગ વાળાની દુકાન વાળી શેરીમાં ગ્લોબ કોમ્પ્લેક્સમાં આવેલી પોતાની જોજો ઓફિસ નામની દુકાનમાં ગાંજાનો જથ્થો છુપાવીને રાખ્યો છે. આ બાતમીના આધારે પોલીસની ટીમને દરોડો પાડ્યો હતો.
પોલીસે અહીં તપાસ કરતા અહીંથી રૂપિયા ૩૯૦૦ ની કિંમત નો ૩૯૦ ગ્રામ ગાંજાનો જથ્થો મળી આવ્યો હતો. પોલીસે ગાંજાના આ જથ્થા સાથે મહિપત ધીરૂભાઈ ખુમાણ (રહે.યોગી નગર શેરી નંબર એક જેતપુર)ને ઝડપી લીધો હતો અને તેની પૂછતાછ કરતા ગાંજાનો આ જથ્થો તેને જેતપુરમાં ભાદરના સામા કાંઠા વિસ્તારમાં રહેતા ગોવિંદ કેશુભાઈ કરગીયાએ આપ્યો હોવાનું માલુમ પડતાં પોલીસે તેને પણ ઝડપી લીધો હતો. બાદમાં બંને સામે એનડીપીએસ એક્ટની કલમ હેઠળ ગુનો નોંધી કાયદેસરની કાર્યવાહી કરવામાં આવી છે.