રાજકોટમાં 21 માર્ચે ન્યારી ડેમ રોડ પર 18 વર્ષીય એક્ટિવાચાલકને પૂરપાટ ઝડપે આવતી કારે ટક્કર મારી ફંગોળ્યો હતો. આથી આ અક્ટિવાચાલકને હાલત ગંભીર છે. આ હિટ એન્ડ રનના કેસમાં યુવકને કચડનાર નબીરાઓને બચાવવા માટે ડ્રાઈવર જ બદલી નાખ્યાનો ઈજાગ્રસ્ત પરિવાર દ્વારા પોલીસ પર આક્ષેપ કરવામાં આવ્યો છે. આ પરિવારે ગૃહ વિભાગ સુધી આ રજૂઆત કરી હોવાનું જાણવા મળ્યું છે.

ડ્રાઈવર ચેન્જ કરી નાખ્યાનો દાવો કરવામાં આવ્યો
આ હિટ એન્ડ રનની ઘટનામાં વિગત એવી છે કે, 18 વર્ષનો પરાગ ગોહિલ આ અકસ્માતમાં ગંભીર રીતે ઈજાગ્રસ્ત થયો હતો. નબીરાઓએ તેને કાર વડે ફંગોળી નાખ્યો હતો અને પછીથી ત્યાંથી ભાગી ગયા હતા. ત્યારબાદ પોલીસ સાથે સેટિંગ પાડીને તેમણે ડ્રાઈવર ચેન્જ કરી નાખ્યાનો દાવો કરવામાં આવ્યો છે. આ મામલે પોલીસને લેખિત ફરિયાદમાં જણાવી દેવાયું છે. આ ઘટનાનો સીસીટીવી ફૂટેજ સામે આવ્યા છે જેના પરથી પીડિત પરિવારે રાજકોટ પોલીસ પર સેટિંગ કરીને આ ઘટનાને અંજામ અપાયાનો દાવો કરવામાં આવ્યો છે. 

ખોટો ડ્રાઈવર રજુ કરી આ કેસ રફેદફે કરવાના પ્રયાસો 
FIRમાં પીડિત પરિવારે દાવો કર્યો છે કે, નબીરાઓની કારમાં અકસ્માત સમયે ત્રણ લોકો સવાર હતા, જેમાંથી એક વ્યકિત કે જે ડ્રાઈવર સાઈડના દરવાજેથી નીકળીને પાછળના દરવાજે આવી બેસી જાય છે અને ગાડીમાં પાછળ બેઠેલો યુવક આવીને ડ્રાઈવર સીટ પર બેસી જાય છે. પરિવારનો આરોપ છે કે, પોલીસ દ્વારા ખોટો ડ્રાઈવર રજુ કરી આ કેસ રફેદફે કરવાના પ્રયાસો થઈ રહ્યા છે.

નબીરાઓને બચાવવાનો પ્રયાસ કરવામાં આવ્યો 
તાલુકા પોલીસે આ મામલે પીડિતોને યોગ્ય જવાબ ન આપતાં આ મામલો ગૃહ વિભાગ સુધી પહોંચી ગયો હતો. અકસ્માત કેસમાં સૌરાષ્ટ્ર યુનિવર્સિટીના કાયદા વિભાગના હેડ ઓફ ધ ડિપાર્ટમેન્ટ (HOD) રાજુ દવેના પુત્ર તેમજ ભાભા ગેસ્ટ હાઉસના માલિકના પુત્રને બચાવવા માટે રાજકોટ પોલીસ દ્વારા આ તરકટ રચ્યાનો દાવો કરવામાં આવ્યો છે. પ્રવીણસિંહ બચુભાઈ જાડેજાને અકસ્માત કેસમાં ખોટી રીતે ડ્રાઈવર બનાવીને નબીરાઓને બચાવવાનો પ્રયાસ કરવામાં આવ્યો છે. 

ફરિયાદી ક્રિશ મેર દ્વારા લેખિત ફરિયાદ આપી હતી
જગદીશ બાંગરવા ડીસીપી ઝોન 2 જગદીશ બાંગરવાએ જણાવ્યું હતું કે, રાજકોટ તાલુકા પોલીસ સ્ટેશનમાં 21 તારીખે દાખલ કરવામાં આવી હતી. ફરિયાદી ક્રિશ મેર દ્વારા લેખિત ફરિયાદ આપી હતી. નેક્સોન કારે બાઇકને અડફેટે લીધું હતું. કાર પ્રવીણભાઈ બચુભાઇ જાડેજા દ્વારા ચલાવવામાં આવતી હોવાની ફરિયાદીએ જ જણાવ્યું હતું. પ્રવીણભાઈ જાડેજાએ પણ પોલીસ સ્ટેશન આવી કબુલ્યૂં હતું. કોઈની અટકાયત કે ધરપકડ કરવામાં આવી નથી.
    

પોલીસ દબાણ કરે છે તે ખોટા આક્ષેપો છે
વધુમાં જણાવ્યું હતું કે, મૃતકના માતા કે ફરિયાદી હજુ પણ પોલીસ પાસે આવી માહિતી આપી શકે છે. 21 તારીખે ફરિયાદ દાખલ થઈ જેમાં 22 તારીખે સીસીટીવી ફૂટેજ પોલીસને આપ્યા છે. પોલીસ પાસે એવા કોઈ સીસીટીવી નથી કે તેમાં ડ્રાઇવર બદલતો હોય. પોલીસ દબાણ કરે છે તે ખોટા આક્ષેપો છે. કાર રાજેશકુમાર મહેતાના નામની હોવાનું સામે આવ્યું છે. તપાસનીશ અમલદાર સામે આરોપ લાગ્યો હોવાથી તપાસ તેની પાસેથી લઈ લેવામાં આવી છે. રાજેશકુમાર મહેતાના પુત્ર અને એક તેનો મિત્ર સાથે હતો. આ કેસમાં PSIનો કોઈ રોલ નથી. ફરિયાદીએ જેનું નામ આપ્યું તેની સામે જ ગુનો નોંધવામાં આવ્યો છે.​​​​​​​

આ કેસમાં જેનું નામ સામે આવ્યું છે તેના પિતાનું શું કહેવું છે?
સૌરાષ્ટ્ર યુનિવર્સિટીના હ્યુમન રાઇટ્સ વિભાગના વડા રાજુભાઇ દવેએ જણાવ્યું હતું કે, આ ઘટનામાં મારા પુત્રનું નામ આવ્યું છે. મારો પુત્ર આ અકસ્માત સમયે ક્યાંય રોલ નથી.
મેં ઇજાગ્રસ્તના પરિવાર સાથે વાત કરી છે. પોલીસ કાર્યવાહી ચાલુ છે હું સ્ટેટમેન્ટ ન આપી શકું. પોલીસ સમગ્ર મામલે તપાસ કરી રહી છે. મારો પુત્ર ક્યાંય છે જ નહીં, કારમાં પણ મારો પુત્ર નહોતો. મારા પુત્રને પણ ભાભા ગેસ્ટ હાઉસના માલિકના પુત્ર સાથે પણ સબંધ નથી. મારો કે મારા ભાઈ જશ્મિનના પુત્રનો પણ કોઈ રોલ નથી. મારા ભાઈ પોલીસ સ્ટેશને જઈ આવ્યા છે અને પોલીસ કાર્યવાહી કરવામાં આવી રહી છે. મારા ભાઈ જશ્મિનભાઈ દવેનો પુત્ર છે તે અંગે પોલીસ તપાસ કરે છે. પોલીસ કાર્યવાહી કરે છે તપાસ ચાલુ છે.