શહેરના કુવાડવા રોડ પર ક્રિષ્ના કાઠિયાવાડી હોટેલ પાસે આવેલા સીએનજી પંપએ ત્રણેક દિવસ પહેલા ગેસ ભરાવવા બાબતે બે કાર ચાલકો વચ્ચે બોલાચાલી થયા બાદ સામસામા ધોકા પાઇપ ઉડ્યા હતા જેમાં પિતા પુત્ર સહીત ત્રણ વ્યક્તિને ઇજા થઇ હતી. આ બાબતની કુવાડવા પોલીસમાં સામસામી ફરિયાદો પણ નોંધવામાં આવતા પોલીસે પિતા પુત્ર સહીત આઠ શખ્સો સામે ગુનો નોંધ્યો હતો. પરંતુ ગુનેગારો તો ઠીક આમ લોકોને પણ પોલીસની જાણે બીક જ ન હોય તેમ ત્રણ દિવસ પહેલાની પોલીસ ફરિયાદ બાદ પણ પિતા પુત્ર સહિતના શખ્સોએ ફિલ્મી ઢબે કારમાં આવી પંપે થયેલી માથાકૂટનો ખાર રાખી સામાપક્ષના કાર ચાલક અને તેના મિત્રને બેફામ ધોકા પાઇપ વડે મારમારી કારના કાચ તોડી નાખી નુકસાન કર્યું હતું. પોલીસથી બેખૌફ બનેલા હુમલાખોરોનો વિડીયો પણ સોશિયલ મીડિયામાં વાયરલ થયો છે.

પ્રાપ્ત વિગત મુજબ રામપરા બેટી ગામે રહેતો એન એરપોર્ટમાં કાર રાખી ડ્રાઇવિંગ કરતો કિશન દુધરેજીયા (ઉ.વ.25)નો યુવક ગઈકાલે મિત્રો સાથે કારમાં જઈ રહ્યો હતો ત્યારે પાછળથી આવતી બે કાર કિશનની કાર બાજુ દબાવતા કિશને કાર બેટી રામપરા હાઇવે પરની હોટેલ પાસે ઉભી રાખતા પાછળની બે કારમાંથી મયુર રેવા ભરવાડ તેના પિતા રેવા ધનાભાઈ ભરવાડ સહીત અજાણ્યા પાંચથી છ શખ્સો ધોકા પાઇપ સાથે ઉતરતા કિશન અને મિત્ર જયેશ જીવ બચાવવા ભાગ્યા હતા. તેની પાછળ આ શખસો દોડી ધોકા પાઇપથી તૂટી પડ્યા હતા. જેમાં કિશન અને જયેશને ઇજા થઇ હતી. શખ્સોએ વાહનોમાં પણ તોડફોડ કરતા નુકશાન થયું હતું. બનાવ અંગે કિશન દુધરેજીયાની ફરિયાદના આધારે કુવાડવા પોલીસે મયુર તેના પિતા રેવા બોરસીયા સહીત અજાણ્યા શખ્સો સામે ગુનો નોંધ્યો છે.

અત્રે ઉલ્લેખનીય છે કે, જુના માર્કેટ યાર્ડ પાસે માલધારી સોસાયટી શાળા નં-17માં રહેતો રાહુલ રેવાભાઈ બોસરીયા (ઉ.વ.25)નો ગત તા.15ના કુવાડવા રોડ પર ક્રિષ્ના કાઠિયાવાડી હોટેલ પાસે આવેલા સીએનજી ગેસ પંપમાં સ્વીફ્ટ કારમાં ગેસ ભરાવવા માટે ગયો હતો ત્યારે લાઈનમાં વારા બાબતે કાર ચાલક કિશન દુધરેજીયા સાથે ગાળાગાળી થતા કિશન અને તેની સાથેના અજાણ્યા ત્રણ શખસોએ મયુર અને તેના પિતા રેવાભાઈ ઉપર હુમલો કર્યો હતો જયારે સામાપક્ષે કિશન દુધરેજિયાને આ માથાકુર થતા ત્યારે તેણે રામપર બેટી ગામે રહેતા તેના મિત્ર જયદીપ જગદીશભાઈ મકવાણા (ઉ.વ.20)ને ફોન કરીને બોલાવ્યો હતો દરમિયાન રાહુલ ભરવાડ તેના પિતા રેવાભાઈ અને બીજા બે અજાણ્યાએ ધોકા પાઇપ વડે મારમારતા જયદીપને માથામાં ઇજા થઇ હતી. આ બાબતે બને પક્ષે સામસામી ફરિયાદ નોંધાવતા પોલીસે આઠ સામે ગુનો નોંધ્યો હતો. જેનો ખાર રાખી ફરી હુમલો કરવામાં આવ્યો છે. પોલીસે ફરાર પિતા પુત્ર સહિતની શોધખોળ હાથ ધરી છે.