રાજકોટ મનપાની સામાન્ય સભા છે. જોકે વિપક્ષ દ્વારા ફાયરના મિનિ સિલિન્ડર સાથે બહાર વિરોધ કરવામાં આવ્યો હતો. ફાયરનું મિનિ સિલિન્ડર સામાન્ય સભામાં લઈ જતા વિજિલન્સના સ્ટાફે વિપક્ષને અટકાવ્યું હતું. તેમજ ફાયરનું મિનિ સિલિન્ડર વિજિલન્સે લઈ લીધું હતું. આથી વિપક્ષ અને વિજિલન્સ સ્ટેફ વચ્ચે તુંતું મેંમેં થઈ ગઈ હતી. 

એટલાન્ટિસ એપાર્ટમેન્ટમાં લાગેલી આગને લઇ વિપક્ષે વિરોધ કર્યો
મહાનગરપાલિકા ખાતે વિરોધ પક્ષના નેતા વશરામ સાગઠિયા તેમજ સાથી કોર્પોરેટર કોમલ ભારાઈ દ્વારા પ્રતિકાત્મક વિરોધ કરવામાં આવ્યો હતો. બન્ને ફાયરનુ સિલિન્ડર લઈ મનપા કચેરીએ પહોંચ્યા હતા. આ વિરોધ તાજેતરમાં એટલાન્ટિસ એપાર્ટમેન્ટમાં આગ લાગી હતી તેને લઈને કર્યો હતો. આગના પાંચ દિવસ બાદ પણ રાજકોટ શહેર પોલીસ ફરિયાદ નોંધી શકી નથી તેવો વિપક્ષે આક્ષેપ કર્યો હતો.  ઉલ્લેખનીય છે કે, એટલાન્ટિસ એપાર્ટમેન્ટમાં આગ લાગવાના કારણે ત્રણ લોકોના મોત થયા હતા. તેમજ છેલ્લા 9 મહિનાથી મનપાના ચીફ ફાયર ઓફિસરની જગ્યા ખાલી છે.