રાજકોટ-ગોંડલ હાઈવે પર ભુણાવા ગામ નજીક શક્તિમાન ફેક્ટરી પાસે ગમખ્વાર અકસ્માત થયો હતો. ખાનગી ટ્રાવેલ્સની બસ અને ટ્રક વચ્ચે અકસ્માત થતા એક મહિલાનું ઘટનાસ્થળે જ મોત નીપજ્યું હતું જ્યારે આઠ લોકોને ઇજા પહોંચી હતી. ઈજાગ્રસ્તોને સારવાર માટે હોસ્પિટલ ખસેડવામાં આવ્યા હતા. 

ઈજાગ્રસ્તોને ઈમરજન્સી દરવાજો ખોલીને બહાર કાઢવામાં આવ્યા હોવાનું જાણવા મળ્યું છે. ઇજાગ્રસ્તોને ગોંડલ સિવિલ તેમજ રાજકોટ હોસ્પિટલ ખાતે સારવાર માટે ખસેડવામાં આવ્યા છે. મૃતક મહિલાના મૃતદેહને પીએમ માટે ગોંડલ સિવિલ હોસ્પિટલ ખસેડાયો છે. ઘટનાની જાણ થતાં ગોંડલ તાલુકા પોલીસ ઘટનાસ્થળે પહોંચી હતી. અકસ્માતના બનાવને પગલે નેશનલ હાઈવે પર ટ્રાફિકજામ થયો હતો.