વેસ્ટર્ન ડિસ્ટર્બન્સના કારણે ભાવનગર જિલ્લામાં સતત ત્રીજા દિવસે વરસાદી માહોલ રહયો છે.જિલ્લામાં આજે બપોર સુધીમાં પા થી અઢી ઇંચ કમોસમી વરસાદ પડ્યો છે.ભાવનગર શહેરમાં અઢી ઇંચ વરસાદથી ઠેર ઠેર પાણી ભરાયાં છે.અનેક વિસ્તારોમાં વીજળી ગુલ થવાથી લોકો પરેશાન થયા છે. ભાવનગર શહેરમાં ગઈકાલે મધરાતથી આજે બપોરે બાર વાગ્યા સુધીમાં ભાવનગરમાં અઢી ઇંચ વરસાદ ખાબક્યો હતો.આથી ઠેર ઠેર પાણી ભરાતા લોકો અને વાહનચાલકો હાલાકીમાં મૂકાયા હતા.આજે ત્રીજા દિવસે પણ અનેક વિસ્તારોમાં વીજળી ગુલ થઈ હતી. આજે ઘોઘા અને પાલીતાણામાં  સવા ઇંચ, ગારિયાધારમાં એક ઈંચ,ઉમરાળા,સિહોર,મહુવા, તળાજામાં અર્ધો ઇંચ વલભીપુરમાં પા ઇંચ વરસાદ પડ્યો હતો.જેસરમાં વરસાદે વિરામ લીધો હતો. આજે બુધવારે વહેલી સવારથી બપોરે ૧૨ વાગ્યા સુધીમાં મહુવામાં ૧૨,સિહોરમાં ૧૨, પાલીતાણામાં ૨૯,ઉમરાળામાં ૧૩,તળાજામાં ૧૦, ભાવનગરમાં ૬૩,ગારિયાધારમાં ૨૬,ઘોઘામાં ૩૩ અને વલભીપુરમાં ૯ મિ.મી. વરસાદ સરકારી ચોપડે નોંધાયો હતો.