સુપ્રીમ કોર્ટે આજે "બુલડોઝર જસ્ટિસ"ના વલણ પર આકરી પ્રતિક્રિયા આપી કહ્યું કે અધિકારીઓ કોઈ વ્યક્તિના મકાનને માત્ર એ આધાર પર ન તોડી શકે કે તે ગુનાનો આરોપી છે. આ મામલે ઓલ ઈન્ડિયા મજલિસ-એ-ઈત્તેહાદુલ મુસ્લીમીન (AIMIM)ના ચીફ અસદુદ્દીન ઓવૈસીએ કહ્યું કે સુપ્રીમ કોર્ટે તેને અરાજક સ્થિતિ ગણાવી છે.

એઆઈએમઆઈએમના વડાએ સોશિયલ મીડિયા પ્લેટફોર્મ પર કહ્યું કે આપણે યાદ રાખવું જોઈએ કે નરેન્દ્ર મોદીએ પણ બુલડોઝર શાસનની ઉજવણી કરી હતી, જેને સુપ્રીમ કોર્ટે આજે "કાયદેસર પરિસ્થિતિ" ગણાવી છે.

સુપ્રીમે શું કહ્યું?

જસ્ટિસ બીઆર ગવઈ અને કે.વી. વિશ્વનાથનની બેન્ચે કહ્યું, "એક્ઝિક્યુટિવ કોઈ વ્યક્તિને દોષિત ઠેરવી શકે નહીં. માત્ર આરોપના આધારે, જો કાર્યપાલિકા વ્યક્તિની મિલકતને તોડી નાખે છે, તો તે કાયદાના શાસનના સિદ્ધાંત પર હુમલો હશે. કાર્યપાલિકા જજ બનીને આરોપીઓની સંપત્તિને તોડી શકાય નહીં."

સુપ્રીમ કોર્ટે કહ્યું કે કાયદાનું શાસન એક માળખું પૂરું પાડે છે જે સુનિશ્ચિત કરે છે કે વ્યક્તિઓ જાણે છે કે તેમની મિલકત મનસ્વી રીતે લેવામાં આવશે નહીં. કોર્ટે વધુમાં જણાવ્યું હતું કે એવા કિસ્સામાં પણ જ્યાં લોકો ડિમોલિશનના આદેશનો વિરોધ કરવા માંગતા ન હોય, તેમને ખાલી કરવા અને તેમની બાબતોને વ્યવસ્થિત કરવા માટે પૂરતો સમય આપવો જોઈએ.

સુપ્રીમ કોર્ટે માર્ગદર્શિકા જાહેર કરી

બેન્ચે કહ્યું, "મહિલાઓ, બાળકો અને બીમાર લોકોને રાતોરાત રસ્તાઓ પર ખેંચી જવામાં આવે તે સુખદ દ્રશ્ય નથી." બેન્ચે એમ પણ કહ્યું હતું કે, "જો અધિકારીઓ થોડો સમય શાંતિ રાખીને બેસે તો તેમને કોઈ મુશ્કેલી નહીં આવે." વધુમાં, બેન્ચે કાર્યપાલિકાને મિલકત તોડી પાડવા પહેલાં અનુસરવા માટેની માર્ગદર્શિકાની યાદી જારી કરી હતી.