ભારતમાં કફ સિરપના બેફામ વેચાણ સામે સરકારે હવે કડક વલણ અપનાવ્યું છે. ભેળસેળ, કાઉન્ટર પર વેચાણ અને અસંખ્ય કૌભાંડોના તાજેતરના અહેવાલોને ધ્યાનમાં રાખીને, કેન્દ્રીય આરોગ્ય અને પરિવાર કલ્યાણ મંત્રાલયે એક જાહેરનામું બહાર પાડ્યું છે જેમાં કહેવામાં આવ્યું છે કે કફ સિરપ સહિત તમામ પ્રકારના સિરપ ડૉક્ટરના પ્રિસ્ક્રિપ્શન વિના ખરીદી શકાતા નથી. આનો અર્થ એ છે કે કફ સિરપ હવે મેડિકલ સ્ટોર્સમાં પ્રિસ્ક્રિપ્શન વિના ઉપલબ્ધ રહેશે નહીં. આ સિરપ ખરીદવા માટે ડૉક્ટરનું પ્રિસ્ક્રિપ્શન જરૂરી રહેશે.

આરોગ્ય મંત્રાલયે શેડ્યૂલ કેમાં લીસ્ટેડ કેટલીક દવાઓ સંબંધિત નિયમોમાં સુધારો કર્યો છે. આ સુધારાથી લીસ્ટમાંથી સિરપ શબ્દ દૂર કરવામાં આવ્યો છે. આ નવા નિયમને ડ્રગ્સ (પાંચમો સુધારો) નિયમો, 2026 કહેવામાં આવશે. આ નવા નિયમને પગલે, લાઇસન્સ અથવા પ્રિસ્ક્રિપ્શન વિના સિરપ વેચનારાઓ સામે કડક કાર્યવાહી કરવામાં આવશે. આવા દવા વેચનારાઓના લાઇસન્સ પણ રદ કરવામાં આવશે. સરકારે ઓવર-ધ-કાઉન્ટર સીરપથી થતા નુકસાન અને બાળકોની સલામતીને ધ્યાનમાં રાખીને આ નિર્ણય લીધો હતો. આ નિર્ણયની સમીક્ષા અને દેખરેખ થોડા સમય પછી કરવામાં આવશે.

મધ્યપ્રદેશ અને રાજસ્થાનમાં કફ સિરપથી બાળકોના મૃત્યુના તાજેતરના કિસ્સાઓને પગલે કેન્દ્ર સરકારે કડક નિર્ણય લીધો છે. આ મામલે કેન્દ્રીય આરોગ્ય મંત્રાલયની એક બેઠક યોજાઈ હતી, જેમાં આરોગ્ય સચિવ પુણ્ય સલિલા શ્રીવાસ્તવે રાજ્યોને કડક સૂચનાઓ જારી કરીને જણાવ્યું હતું કે કોઈપણ સ્તરે બેદરકારી સહન કરવામાં આવશે નહીં. તમામ રાજ્યોમાં જિલ્લા દવા ફેક્ટરીઓનું નિરીક્ષણ કરવામાં આવશે, અને જો નિયમોનું ઉલ્લંઘન કરવામાં આવશે તો ફેક્ટરી લાઇસન્સ રદ કરવામાં આવશે. આ બેઠકમાં દેશભરના 200 થી વધુ આરોગ્ય અધિકારીઓ હાજર રહ્યા હતા.