યાર્ડની સામે ખેડુતના મકાનમાંથી 2.10 લાખના દાગીનાની ચોરી : શહેરમાં તસ્કરોની રંજાડ યથાવત

જામનગર શહેરમાં વધુ એક ચોરીનો બનાવ સામે આવ્યો છે, હાપા યાર્ડ નજીક વાડી વિસ્તારમાં આવેલા એક મકાનમાં સપ્તાહ પહેલા ત્રાટકેલા શખ્સો 2.10 લાખની કીંમતના સોનાના દાગીના ચોરી કરી ગયા છે જે અંગે ફરીયાદ કરવામાં આવતા તપાસ ચલાવવામાં આવી રહી છે.

જામનગરના હાપા માર્કેટીંગ યાર્ડની સામે રેલ્વેના ફાટકની બાજુમાં વાડી વિસ્તારમાં રહેતા, ખેતીકામ કરતા ધર્મેશ દેવશીભાઇ ચૌહાણ (ઉ.વ.40)ના ઘરમાં ગત તા. 25-3-24ના સમયગાળા દરમ્યાન કોઇ અજાણ્યા તસ્કરો ગેરકાયદે પ્રવેશી દરવાજાનો લોક તોડી અંદર ત્રાટકયતા હતા.

દરમ્યાન ઘરમાંથી જુના સોનાના દાગીના જેમાં એક હાર, લકી, બે નંગ સોનાની બંગડી, બે સોનાની વીંટી, સોનાનો ચેન, એક પેડલ મળી આશરે સાડા આઠેક તોલા સોનું જેની કિ. ા. 2.10 લાખના દાગીના ચોરી કરી ગયા હતા.

ધર્મેશભાઇ દ્વારા ગઇકાલે સીટી-એ ડીવીઝનમાં અજાણ્યા ઇસમો વિરુઘ્ધ ફરીયાદ નોંધાવતા પોલીસ દ્વારા તપાસ ચલાવવામાં આવી રહી છે, ઉલ્લેખનીય છે કે શહેર વિસ્તારમાં છેલ્લા થોડા સમયથી તસ્કરોની રંજાડ યથાવત રહેવા પામી છે, ખોડીયાર કોલોની વિસ્તારમાં દુકાન અને મકાનમાં થયેલી ચોરીના બનાવો તાજા છે ત્યાં વધુ એક ઘરમાં હાથ ફેરો થયો છે.