બે પાંજરા મુકાયા 

જામનગરની ભાગોળે આવેલ વિખ્યાત ખીજડીયા પક્ષી અભયારણ્યમાં શનિવારે દીપડાના  ફૂટ પ્રિન્ટ મળી આવતા ફોરેસ્ટ ડીપાર્ટમેન્ટ હરકતમાં આવ્યું હતું,અને પક્ષી અભયારણ્ય પાર્ટ-૧ મુલાકાતીઓ માટે બંધ કરીને દીપડાના સગડ મેળવવા ટીમ દ્વારા કાર્યવાહી હાથ ધરવામાં આવી હતી.

ખીજડીયા પક્ષી અભ્યારણ પાર્ટ વનમાં પેટ્રોલિંગ દરમિયાન એક દીપડાના ફુટ પ્રિન્ટ મળી આવ્યા હતા, જ્યારે દીપડો આંટાફેરા કરતો હોય તેવો એક વિડિયો પણ સામે આવ્યો હતો. જેને લઈને તંત્ર હરકતમાં આવ્યું હતું, અને તાત્કાલિક અસરથી ખીજડીયા પક્ષી અભ્યારણ પાર્ટ-૧ ને લોકોની અવરજવર માટે બંધ કરી દેવામાં આવી હતી 

ફોરેસ્ટ વિભાગની ટીમની શોધ ખોળ દરમિયાન દીપડાના વધુ ફુટ પ્રિન્ટ મળી આવ્યા હતા. તપાસમાં તેણે એક ભૂંડનું મારણ કર્યું હોવાનું પણ ધ્યાનમાં આવ્યું હતું, અને તેના અવશેષો મળ્યા છે.દીપડો પાર્ટ -૧ વિસ્તારમાં જ આટા ફેરા કરતો હોવાથી ફોરેસ્ટ વિભાગની જુદી જુદી બે ટુકડીઓ દ્વારા નાઈટ પેટ્રોલિંગ શરૂ કરી દેવામાં આવ્યું હતું, જેમાં દીપડા દ્વારા કરવામાં આવેલ વધુ બે મારણ અને વધુ ફૂટ પ્રિન્ટ મળી આવ્યા હતા.ઉપરાંત પક્ષી અભ્યારણ પાર્ટ-૧ ના અલગ અલગ બે વિસ્તારમાં પાંજરા પણ ગોઠવવામાં આવ્યા છે અને તેના પર વોચ રાખવામાં આવી રહી છે. 

ફોરેસ્ટ ડીપાર્ટમેન્ટ દ્વારા દીપડાને પકડવા બે પાંજરા ગોઠવી દેવામાં આવ્યા છે ફોરેસ્ટ ડીપાર્ટમેન્ટના ઓફિસર દક્ષાબેન વઘાસિયાની દેખરેખ હેઠળ ૧૧ કર્મચારીઓની ટીમ કાર્યરત છે. આ વિસ્તારમાં દીપડાની એન્ટ્રીને લઈને આસપાસના વિસ્તારના લોકોમાં ભયનો માહોલ ફેલાયો છે.