ગઇકાલે જીરુ તથા નવા ધાણાની આવક થઇ હતી

જામનગર હાપા માર્કેટીંગ યાર્ડમાં આજે નવા ચણાની આવક થઇ છે, આ નવા ચણાના મણના ભાવ રુા. ૧૨૫૧ બોલાયા હતા. જામજોધપુર તાલુકાના ડેરી આંબરડી ગામના ખેડુત રમેશભાઇ જેસાભાઇ પીપરોતર દ્વારા આ નવા ચણા લાવવામાં આવ્યા હતા જેને એસ.એન.એસ. ટ્રેડીંગ કંપનીએ ઉકત ભાવે ખરીદયા હતા અને તેના કમિશન એજન્ટ જે.જે. એન્ટરપ્રાઇઝ હતા.
નવા ચણાની સાથો સાથ ગઇકાલે જીરુ અને ધાણાની પણ આવક થઇ હતી, અત્રે ઉલ્લેખનીય છે કે સૌરાષ્ટ્રના અન્ય યાર્ડોની સરખામણીમાં હાપા યાર્ડમાં ખેડુતોને પોતાની જણસના સારા ભાવ મળતા હોવાથી દુર દુરથી ખેડુતો હોશે હોશે હાપા માર્કેટીંગ યાર્ડમાં પોતાની જણસ વેચવા માટે આવતા હોય છે.
ગઇકાલે અન્ય જણસ તરફ દ્રષ્ટીતાપ કરીએ તો મગફળી, કપાસ, અજમો, અજમાની ભુંસી, સુકી ડુંગળી, ઘઉંની આવક થવા પામી હતી જેમાં કપાસના મણના ૧૫૦૦રુા. સુધી બોલાયા હતા, જયારે જીરુના ૩૫૦૦ થી ૬૦૦૦, અજમો ૨૩૦૦ થી ૫૪૫૦, સુકા મરચા ૧૪૦૦ થી ૫૦૦૦, લસણ ૧૮૦૦ થી ૪૨૦૦, ઘઉં ૪૫૦ થી ૫૫૮ સુધી બોલાયા હતા.
ગઇકાલે કુલ જણસ ૩૯૨૮૬ મણ, ૧૫૩૫૮ ગુણી જે ૧૨૦૫ ખેડુતો દ્વારા લાવવામાં આવી હતી. જે પૈકી સૌથી વધુ કપાસની ૧૩૮૩૩ મણ, લસણ ૯૯૯૦ મણ, મગફળી ૧૯૭૮ મણ, ઘઉં ૮૧૫ મણ, ચણા ૨૮૩ મણ, અજમો ૪૫૭૯ મણ, અજમાની ભુંસી ૨૩૯૩ મણ જયારે ડુંગળી સુકી ૨૨૭૭ મણ અને સુકા મરચા ૬૨૦ મણ આવ્યા હતા.