ઇઝરાયલી વડા પ્રધાન બેન્જામિન નેતન્યાહૂ પ્રત્યે દેશમાં વધતો અસંતોષ ફરી એકવાર સામે આવ્યો છે. શુક્રવારે પ્રસારિત ચેનલ 12ના સર્વેમાં, મોટાભાગના ઇઝરાયલી નાગરિકો માનતા હતા કે નેતન્યાહૂની પ્રાથમિકતા યુદ્ધ જીતવી કે બંધકોને મુક્ત કરાવવાની નથી, પરંતુ સત્તામાં રહેવાની છે.એક અહેવાલ મુજબ, સર્વેમાં પ્રતિભાવ આપનારા 55% લોકોએ કહ્યું કે નેતન્યાહૂ સત્તા બચાવવાનો પ્રયાસ કરી રહ્યા છે, જ્યારે ફક્ત 36% લોકોએ કહ્યું કે તેમનો હેતુ બંધકોને મુક્ત કરવાનો છે. જ્યારે યુદ્ધ જીતવાના સંદર્ભમાં પ્રશ્ન પૂછવામાં આવ્યો ત્યારે પણ આંકડા લગભગ સમાન રહ્યા. આ અઠવાડિયે નેતન્યાહૂ દ્વારા યોજાયેલી પ્રેસ કોન્ફરન્સ પર પણ જનતાને વિશ્વાસ નહોતો. ૬૨% લોકોએ કહ્યું કે નેતન્યાહૂ તેમની દલીલોથી તેમને મનાવવામાં નિષ્ફળ ગયા, જ્યારે માત્ર ૩૪% લોકોએ સમર્થન વ્યક્ત કર્યું.

લોકો માનવા લાગ્યા કે સરકાર ચૂંટણી મુલતવી રાખશે

એક આશ્ચર્યજનક પ્રશ્નમાં, જ્યારે પૂછવામાં આવ્યું કે શું વર્તમાન સરકાર "રાષ્ટ્રીય કટોકટી" ના નામે આગામી વર્ષની ચૂંટણીઓ રદ કરી શકે છે, ત્યારે ૫૦% લોકોએ કહ્યું કે તે શક્ય છે, જ્યારે ૩૫% લોકોએ તેને નકારી કાઢ્યું.દરમિયાન, દેશના અગ્રણી વિપક્ષી નેતા યાયર ગોલાનની લોકપ્રિયતામાં કોઈ ખાસ ઘટાડો થયો નથી. તેમણે એવું નિવેદન આપ્યું હતું કે બાળકોની હત્યા કરવી હવે ગાઝામાં એક શોખ બની ગઈ છે. આ નિવેદન પછી પણ તેમની ખ્યાતિમાં કોઈ ઓટ આવી નથી. સર્વેમાં, 7% લોકોએ કહ્યું કે તેઓ પહેલા મતદાન કરવાના નહોતા પણ હવે મતદાન કરશે, જ્યારે 5% લોકોએ કહ્યું કે નિવેદનને કારણે તેઓ હવે મતદાન નહીં કરે.