અમેરિકા દુનિયાનો સૌથી ધનિક દેશ હોવા છતાં ત્યાંના ઓછી આવક ધરાવતા લોકોને મોંઘવારી સતાવી રહી છે. ઘણા લોકો બે ટંક પેટ ભરીને ખાઈ શકતા નથી અને એક ટાઈમ ભૂખ્યા રહે છે. ગ્રોસરીના ભાવ સતત વધતા જાય છે ત્યારે લોકોની આવકમાં એટલો વધારો નથી થયો. ફૂડ, વીજળી અને ભાડા પાછળ લોકોની આવક જતી રહે છે.એક સરવે પ્રમાણે 25 ટકાથી વધુ અમેરિકનોને ત્રણેય ટંક પેટ ભરીને ખાવાનો ખર્ચ પોસાતો નથી તેથી લોકો ભૂખ્યા રહે છે અને દરરોજ એક ટાઈમ ખાવાનું ટાળે છે. ભારતની જેમ અમેરિકામાં પણ કરિયાણાના ભાવ આસમાને પહોંચી ગયા છે અને દર ચારમાંથી એક અમેરિકનને આ ભાવ પોસાતા નથી.

33 ટકાથી વધુ અમેરિકનોએ કહ્યું કે ગ્રોસરી નથી પોસાતી
અમેરિકા માટે આ અત્યાર સુધીનો સૌથી આંચકાજનક રિપોર્ટ ગણવામાં આવે છે. એક સરવેમાં 80 ટકા જેટલા અમેરિકનોએ કહ્યું કે તાજેતરના વર્ષોમાં ગ્રોસરીનો ખર્ચ ઘણો વધી ગયો છે. મોટા ભાગના કહે છે કે ગ્રોસરીના ભાવ તેમની પહોંચની બહાર જતા રહ્યા છે. આ કારણથી ઘણા લોકો એક ટંક ભૂખ્યા પણ રહે છે. 33 ટકાથી વધુ અમેરિકનોએ કહ્યું કે તેમની માસિક આવકનો 60 ટકાથી વધુ હિસ્સો ફૂડ, વીજળી અને ઘરના ભાડામાં જતો રહે છે. આ બધા ફરજિયાત ખર્ચ છે અને તેમાં કાપ મૂકવાનું શક્ય નથી.ક્ધઝ્યુમર ફાઈનાન્શિયલ એડવોકેટ કોર્ટની એલેવે કહ્યું કે અમેરિકામાં હવે ફૂડ સિક્યોરિટી બહુ મોટો પ્રશ્ન બની ગયો છે અને લાખો-કરોડો અમેરિકનો પાસે પૂરતું ભોજન નથી અથવા તો તેમને હેલ્થી ફૂડ ખાવું પોસાય તેમ નથી. ફૂડ પ્રોડક્ટ અને અનાજના ભાવમાં એટલો બધો વધારો થયો છે કે લોકો મુશ્કેલીમાં છે. ખાસ કરીને જેમની ઓછી આવક છે અને જેમણે પરિવાર ચલાવવો છે તે લોકોનની આવી હાલત છે. હમણાં ફૂડના ફુગાવામાં થોડો ઘટાડો થયો છે છતાં બીજી બધી ચીજોના ભાવ વધી રહ્યા છે. જેમ કે ભાડું અને પેટ્રોલનો ખર્ચ વધી ગયો છે તેથી લોકો નાણાકીય રીતે મુશ્કેલીમાં છે.

કોવિડ પછી ગ્રોસરીના ભાવમાં 25 ટકાનો વધારો
કોવિડ આવ્યો ત્યાર પછી આખી દુનિયામાં ચીજ વસ્તુઓ મોંઘી થઈ છે જેમાંથી અમેરિકા પણ બાકાત નથી. અમેરિકામાં કોવિડ પછી ગ્રોસરીના ભાવમાં સરેરાશ 25 ટકાનો વધારો થયો છે. એપ્રિલ 2024માં કરિયાણાના ભાવમાં સહેજ ઘટાડો થયો હતો. પરંતુ હજુ પણ તે ઉંચા લેવલ પર જ છે. આ સરવેમાં ભાગ લેનારા 44 ટકા અમેરિકનોએ કહ્યું કે તેઓ ફાઈનાન્શિયલ રીતે અનસ્ટેબલ છે. જે અમેરિકન ફેમિલીની વાર્ષિક આવક 50 હજાર ડોલર કરતા ઓછી છે તેમની હાલત વધુ ખરાબે છે.


અમેરિકનો ભારતીયોની જેમ દેવું કરવા લાગ્યા
ભારતમાં જે રીતે લોકોની આવક કરતા જાવક વધી જાય અને જરૂરી ખર્ચ કરવા પણ ન પોસાય ત્યારે લોકો દેવું કરતા હોય છે. અમેરિકામાં પણ લોકો દેવું વધારી રહ્યા છે અને આ સરવેમાં જાણવા મળ્યું કે 55 ટકા લોકો દેવું કરી રહ્યા છે. 80 ટકા લોકોએ કહ્યું કે તેમને સૌથી વધુ ચિંતા ગ્રોસરીના ભાવની છે. ત્યાર પછી પેટ્રોલ, મકાનનું ભાડું અથવા લોનના હપતા અને વીજળીના બિલની ચિંતા હોય છે.