ભારત વિશ્વના એવા દેશોમાં સામેલ છે જ્યાં દારૂનો વપરાશ ખૂબ વધારે છે, અને આ જ કારણ છે કે લિકર સેક્ટરની કંપનીઓ જંગી નફો કરી રહી છે. દેશની સૌથી મોટી લિકર કંપનીઓમાંની એક રેડિકો ખેતાન લિમિટેડે છેલ્લા 90 દિવસમાં તેનો નફો બમણો કરીને સૌને ચોંકાવી દીધા છે.

નફામાં બમણો ઉછાળો
કંપનીએ બીએસઈ (BSE) ને આપેલી માહિતી મુજબ, માર્ચ 2026 માં પૂરા થયેલા ક્વાર્ટરમાં કંપનીનો એકીકૃત ચોખ્ખો નફો વધીને ₹179.46 કરોડ થયો છે. નોંધનીય છે કે ગયા વર્ષે સમાન ક્વાર્ટરમાં કંપનીએ ₹93.07 કરોડનો ચોખ્ખો નફો કર્યો હતો. આમ, એક જ વર્ષમાં કંપનીના નફામાં સીધો 100 ટકાનો વધારો જોવા મળ્યો છે.

આવક અને વેચાણના આંકડા
રેડિકો ખેતાન, જે 'મેજિક મોમેન્ટ્સ વોડકા', '8 PM વ્હિસ્કી', 'રામપુર ઇન્ડિયન સિંગલ માલ્ટ' અને 'જેસલમેર ઇન્ડિયન ક્રાફ્ટ જિન' જેવા જાણીતા બ્રાન્ડ્સ ધરાવે છે, તેના વેચાણમાં પણ નોંધપાત્ર વૃદ્ધિ થઈ છે. કંપનીની કામગીરીમાંથી આવક 15.5 ટકા વધીને ₹5,180.23 કરોડ થઈ છે. માર્ચ ક્વાર્ટરમાં વિદેશી દારૂનું વેચાણ 4 ટકા વધીને 95.2 લાખ કેસ (એક કેસ એટલે 750 ml ની 12 બોટલ) પર પહોંચ્યું છે. અન્ય આવક સહિત કંપનીની કુલ આવક 15.63 ટકા વધીને ₹5,188.12 કરોડ નોંધાઈ છે.

સમગ્ર વર્ષનું પ્રદર્શન અને ખર્ચ
માર્ચ ક્વાર્ટરમાં કંપનીના ખર્ચમાં પણ 13.5 ટકાનો વધારો થયો છે, જે વધીને ₹4,955.40 કરોડ થયો છે. જોકે, સમગ્ર નાણાકીય વર્ષ 2025-26 ની વાત કરીએ તો રેડિકો ખેતાનનો કુલ ચોખ્ખો નફો 75 ટકાના વધારા સાથે ₹604.47 કરોડ થયો છે. આ સમયગાળા દરમિયાન કંપનીની કુલ એકીકૃત આવક 22.7 ટકા વધીને ₹20,988.23 કરોડ રહી છે.

​​​​​​​શેરધારકો માટે ડિવિડન્ડની લહાણી
કંપનીના બોર્ડ ઓફ ડિરેક્ટર્સે નાણાકીય વર્ષ 2025-26 માટે શેરધારકોને ખુશ કરતા ડિવિડન્ડની ભલામણ કરી છે. કંપનીએ ₹2 ના ફેસ વેલ્યુ ધરાવતા ઇક્વિટી શેર પર 450 ટકા એટલે કે શેર દીઠ ₹9 ના અંતિમ ડિવિડન્ડની જાહેરાત કરી છે.